Djokovic leh Alcaraz la kal zel

Djokovic leh Alcaraz la kal zel
US Open khelh mekah tennis player piang chhuak tawh zawng zawng zinga Grand Slam title 25 la tling thei hmasa ber ni tura major trophy vawi khat chiah mamawh tawh Novak Djokovic chuan Nilaini khan a tum ram a pan mekna kawngah set hloh zet chunga American qualifier Zachary Svajda nhnehin third round a lut.
24-times major winner Djokovic hian unforced error tum 14 zet a neih tuarin set khatna a hloh zet a, set hnuhnung pathumah erawh harsatna tawk loin Arthur Ashe Stadium-ah 6-7(5), 6-3, 6-3, 6-1-in Svajda a hneh.
Svajda hian ahmain world number one hlui Serb hi TikTok video-ah a lo chhaih tawh a, khelmualah an intawng a, set khatnaa a chet dan avangin home fans pawh an phur hman viau a, mahse, Djokovic chu Djokovic nge nge a lo la ni rih a, Briton kum 30 mi Cameron Norrie laka fiahna tihtlak deuh zawk tur hmachhawn turin a tlang zawkah a la tang ta rih!
British number two Norrie hian third round luh inchuh inkhel dangah 7-6 (7-5) 6-3 6-7 (0-7) 7-6 (7-4)-in Argentina player Comesana a hneh.
Wimbledon semi-finalist hlui Norrie hian kumin French Open-ah fourth round lutin, Wimbledon-ah quarter-final a thleng bawk a, men’s draw lama British player la dam zinga ranking sang ber a ni mek.
Nilainia US Open third round lut zingah champion tura rinkai dang Carlos Alcaraz tel bawkin, Italy player Mattia Bellucci lakah hnehna nuamsa 6-1, 6-0, 6-3 a chang a, Arthur Ashe Stadium-a first serve points 86% zet hui khan a inrintawkzia a lantir chiang leh hle awm e!
Spaniard second seed Alcaraz hian third-round match pakhatah Italian bawk Luciano Darderi a tum leh ang.
2022 champion Alcaraz chuan inkhelh banah a tir phat atanga a khelh that thu leh Mattia level hre sa chunga khel a nih thu a sawi a; a chak pawh golf swing celebration an tih hmang bawk khan a celebrate leh a; a chak lai a hmuna thlirtu langsar five-time major champion Rory McIlroy hming a lam ri tel bawk. Fourth seed Taylor Fritz pawh kum 22 chhung zet American mipate’n US Open singles title an lak theih tawh loh hnua an beiseina lian ni zui zel turin Nilaini khan second round-ah a chak ve leh ta phawt a, South African Lloyd Harris chu 4-6, 7-6(3,) 6-2, 6-4-a hnehin Swiss qualifier Jerome Kym nen third round an khel leh ang.
Norwegian 12th seed leh finalist hlui ni bawk Casper Ruud erawh Belgian Raphael Collignon chuan 6-4, 3-6, 3-6, 6-4, 7-5-in a hnawtchhuak.