DLSC-in inthlan thlirlawk

State Assembly inthlan tluang tak felfai taka neih a nih theih nan Aizawl District Level Standing Committee (DLSC) chu Zirtawpni khan an chairman, district election officer Nazuk Kumar hoin an thukhawm a. Sawrkar department, political party, Mizoram Journalists’ Association, Mizoram People Forum leh tlawmngai pawl dang, Local Council leh Village Council Association aiawhte an tel.
Chairman chuan Mizoramah inthlan felfai tak neih a ni thin chu mipuiin dan leh thupek an ngaihpawimawh vangte, MPF hmalakna avangte a ni, tiin, tun inthlan pawh tluang taka kalpui a nih theih nan Standing Committee member-te mawhphurhna a sawipui a. Inthlan vuakvetah kawng hrang hranga dan leh thupek bawhchhiat leh buaina lian a thlen lohnan theihtawp chhuah turin a ngen.
Boruak tha tak hnuaiah mipui a tam thei ang berin vote an thlak theihna turin sawrkar department-te chu an ruahmanna siam dan tur a sawipui a, an mawhphurhna tha taka hlen turin a chah. Political party-te pawh vantlang hmun pawimawha banner, poster leh party flag tar tawh lo turin a hriattir a. MPF leh sawrkar department thenkhat chu a tul dan angin a hrana thutkhawm pui a tum bawk.