DM&R Minister-in Neihbawih Quarry tlawh

DM&R Minister-in Neihbawih Quarry tlawh
Nimin khan DM&R Minister Prof. Lalnilawma chuan kar kalta Zirtawpni tlai lama Sihphir Neihbawih-a quarry min chu a hmunah kalin a enfiah. Chhiatna thleng pawi a tih thu leh chhiattawk te chhungkua leh Sihphir khawtlang a tawrhpui thu sawiin, mi pahnih a chhilh bote lakchhuah tuma theitawp chhuaha thawktu Sihphir khawtlang, CYMA te bakah sawrkar department.QRTleh NDRF te chungah lawmthu a sawi bawk.
Quarry min hi sawrkarin a hriat veleh ADDMA leh DM&R official te, Quick Response Team(QRT) leh National Disaster Response Force(NDRF) te a hmunah a tir nghal a. QRT leh NDRF te hi CYMA leh Sihphir khawtlangin a tul angin an lo puibawm bawk. Mi pahnih te lakchhuah hnatawh mek hi DC office, DM&R dept. leh Geology & Mining Dept. official ten a hmunah an vil reng bawk a ni.
He Quarry min hian mi pali delhin, Muana (Manipur) chu a thi a; hliam tuar mipa pakhat damdawi ina enkawl mek a ni a, mi pahnihte erawh quarry min hian chhilh bovin, tun thleng hian an la zawng hmu lova, heng mi pahnih te hi Chakma leh Jharkhand state mi nia hriat an ni.
Prof.Lalnilawma chuan Sihphir khawtlang hruaitute hnenah thingpui lum nan leh mamawha hman atan Rs 10,000/- a hlan a ni.
Quarry min hi home minister K.Sapdanga leh forest minister Lalthansanga te pawhin lo tlawh tawhin, Sihphir khawtlang hruaitu te hnenah hian thingpui lumna tur sumfai te pawh an lo hlan tawh bawk a ni.