James Miahlung
Kum danga lo tih thin ang in Delhi Mizo Zirlai Pawl (DMZP) chuan ni 28.9.2023 khan Mizoram house, Vasant Vihar-ah Delhi-a Mizo zirlai rawn awm tharte tan inchawnglawmna leh infuihna hun a buatsaih a. He programme hi Pu Lalremruata Rokhum, ICAS (1996), Chief Controller of Accounts, Ministry of Power chuan khual lian niin a hmanpui a, University hrang hrang -DU, JNU, Ambedkar University, Amity, Sharda, Christ University leh a dang atangin zirlai lut thar (freshers) mi 300 dawn an chhuak khawm thei.
Programme hi chhawng(session) hnihah then niin, session khatnaah resource person te atanga thusawi/presentation leh sawihona (interactive session) neih a ni a, session hnihnaah hian boruak hlimawm leh zangkhai tak hman niin, khuallian thusawi bakah leh mister/miss fresher thlanna te neih a ni.
Programme senso leh phurrit Mizorama pawl thenkhat programme(freshers social tiam in) leh DMZP freshers social inan lohna langsar deuh mai pakhat chu khual lian atanga cheng khat mah beisei lova sponsorship an hmuh tlemte hmanga progamme hautak lo (simple), changkang em em tho si an buatsaih thei hi a ni. Tun tum programme-ah hian zirlaite tan ruai an buatsaih tih lo thil dangah senso liantham a awm lo va, zai thiam ni se tualchhung (local) zirlaite leh hna dang thawkte an ni a, senso a sang lo ang tih a rin theih.
Mizoram, a bikin thingtlang lamah chuan a tlangpui thuin pawlin programme an hman nikhuaah inbuatsaihna senso a hautak thin em avangin khual lian atangin engemaw beisei a awm thin. A khual liana tangte rilruah sawmna an dawn avanga lawmthu sawi nan engemaw(sum) pekchhuah ve tula a hriatna (bat nei anga inngaihna) a awm ve thin bawk. He tihdan phung(culture)hi kan moral system nghawng pha thil a nih avangin kan bansan ngam a tul.
Khuallian hnen atangin engemaw beisei neih ai chuan sawrkar agency emaw private agency/corporate atanga sponsorship dil hi a finthlak zawk a, khualliana tangte tan pressure a tlem phah bawk ang. Department tam takah hian Information, Education & Communication (IEC)/awareness campaign kalpuina turin a hranin sum dah thin a ni a, heng sumte hi zirlai pawl programme sponsore nan a remchang ve thei ang. Zirlai fuankhawmna freshers social ang hi department scheme leh hmalakna hrang hrang thehdarh nan platfrom remchang tak ni pawhin a lang.
Hman kum khan West Phaileng MZP hruaitute chu zirlai titha chawimawina programme inbuatsaihna tur sum tuak nan an inhlawh a, an entawntlak takzet. West Phaileng zirlai pawlte anga midang tibuai lova mahni intum chawpa programme huaihawt ngam NGO an tam lo viau mai thei.
Tlawmngai pawl leh zirlai pawl programme thenkhat hi chu zep rual lovin a hautak thei hle. Kal an thathnem theih zawk beiseina avanga district/state pawn atanga zaithiam chah chhuah a nih phei chuan senso a tam leh duhzual. Programme buatsaih chhan ber theihnghilh a ni ta emaw tih tur khawpin programme thenkhat hi chu hlimhlawp (entertainment)leh thil dangah a kal nasa zawk thin.
Zirlai tharte hmakhua
Freshers social-in a tum ber chu zirlai tharte lo welcome a, an lekha zirna tur environment thara an awm chhunga an hriattur pawimawh inhrilhriat leh nakinah line hrang hrangah hlawhtlinna an chan theihna tura infuih a ni. Mizoram lama freshers social tam zawkah hi chuan khual lian Minister emaw MLA emaw atanga fuihna thu ngaihthlak, zai leh lam bak a hranpain zirlai tharte tana tangkai tur session dang a awm lutuk ngai lo. Khual lian tur thlan chungchangah pawh zirlaiten zirna kawnga an entawn theih tur lam ai mah chuan programme senso phuruk theih dan tur ngaihtuahnaah a lang lian zawk thin niin a lang.
Tun tum DMZP programme-ah hi chuan khuallian atanga fuihna bakah resource person-te atangin thu tha tak tak ngaihthlak niin, hemi zawh hian zirlai tharte chu an subject lak azirin group-ah then leh an ni a. Group discussion-ah hian resource person leh adviser(college a thawkte)nen zawhna leh chhanna leh sawihona hlawkthlak tak neih leh a ni. DMZP hotute hian nakinah zirlaite hlawkpui theih tur zirna lam hawi seminar buatsaih leh an tum nghe nghe.
Sawm bikte ngaihpawimawh
Programme leh function (entirnan, inneihna) a sawm bik te hi mahni hnaa buai ve tak hun nei lo chung chunga programme ngaihpawimawh avanga sawmna tihhlawtling hram hram an ni hlawm a, function buatsaihtuten a tha thei ang bera lo dawnsawn hi an phu ve a ni. Hemi kawngah hian pawl hruaituten nachang an hriat a pawimawh hle. Programme buatsaihtuten hawihawm taka mi an welcome hian sawm bikte tan a programme-a tel a inchhir awm lohin lawmna (positive feelings) nasa tak a siam thin.
Kumin DMZP freshers social-ah hruaituten khual lian, resource person leh sawmbikte an lo chhawn dan a lungawithlak takzet. Usher leh thawhpuite kutah dah mai lovin President ngei a che chhuak a, Vice President leh midang nen hawihawm takin sawm bikte an kilkawi peih a ni.
A tawp berah chuan freshers social chu zirlai tharte pual a nih ang ngeiin zirlai tharte dah pawimawh hmasak fo ni se, thu sawi, zai leh hlimhlawp dang piah lamah zirlaiten an hlawkpui theih tur session hran duan nachang hriat ni se tun aiin a hlawkthlak ngei ang. Tin, programme senso tihtlem kan zir a, khual lian leh midang kuta innghat lova agency hrang hranga atanga sponsorship zawn thiam te pawh a pawimawh chho zel ang.