Document lem hmang ha daktawr

MZP chuan Mizorama National Health Mission hnuaia dental surgeon hnathawk mek zingah document lem hmanga hna hmu an awm ngeia a hriat avangin RTI Act hmangin a chhui zui a. Doctor a zir chhuahna nia tarlan institution-ah a lut lo tih finfiah a ni a. He dental surgeon hi 2023 February thlaa NHM hnuaia thawk tur lak zinga tel a ni.
MZP-in hemi chungchanga hma la tura health minister an ngen angin health minister chuan a bawhzui nghal a. Ha daktawr hian ni 5 June, 2024 khan amah chhawrtu National Health Mission-ah banna lehkha a thehlut a; banna lehkha hi pawm nghal a ni. MZP hian department dangah pawh dik lo taka hna hmu an awm leh awm loh enzui zel an tum tih an sawi a ni.
Document lem hmanga hna hmuh chungchang hi tunhmaa state danga thil thleng thin anga sawi a nih khan mak kan ti thin hle a; mahse, keimahni state chhung ngeiah pawh a lo thleng reng mai tih han hriat hian, system fel tak kan mamawhzia a lo lang chhuak zel chu a ni ber awm e.
Tuna document lem hmang ha daktawr hian, ha daktawr a zirnaah a pass chhuak tha lo a, authentic certificate pawh a nei lo a; Institution pakhat atangin eng tin tin emaw certificate lem leiin chumi hmang chuan Mizoramah ha daktawr hna a thawk ta tihna a nih hmel a. Tunlai tawng takin ‘a den fia fia’ hle; damlote tawrhna nasa tak thlentir theihna ‘chance’ a zau hle awm e.
Heta tanga lo lang ta chu, hna laknaah hian, document-te a dik (authentic) leh dik loh enfiah zel a pawimawh hle, tih hi a ni. Tuna ha daktawr hian a hna dilnaa document pawimawh te a neih ve thlap si chuan, hna latute tan pawh han rinhlelh nghal ngawt chu thil harsa tak a ni ngei ang. Rinhlelh vang chauha enfiah (check) ni lovin, hna thawk tura lak zawng zawngte document a dik leh dik loh enfiah hrim hrim hi tihdan phung (system)-a neih a ngai, tih hi tuna thil thleng atang hian a lo lang thei ta a ni.
Department dangah pawh hian eng emaw chu a awm thei a nih hmel a; MZP lam pawhin enzui zel an tum tih an sawi a. A bikin technical lamah phei chuan, qualified ni loten hna an thawk ang tih a hlauhawm lehzual; chhiatrupna thlen theihna a ni. Technical bikah hi chuan duhtui lehzual a pawimawh dawn hle a ni.