Document lem siam thintu man

Tunhnaiah document lem siam thin an awm tih hriat a nih avangin Mizoram Police chuan chhuizuiin mi pakhat an man tawh.
Mizoram Police thuchhuak chuan, kumin October 25 khan Vaivakawn Police Station chuan Lalneihpuia, Chawhhmun Aizawl inti social media-ah certificate a siam theih thu a post tih thu an dawng a. He thil hi chhui nghalin, Chawlhhmun atang hian Lalneihpuia (27) hi Vaivakawn PS-ah la in, thu zawhfiah a nih hnuah August 2024 atang khan a mobile phone – Oppo A71k hmangin certificate lem hrang hrang – HSSLC/HSLC marksheet, HSLC certificate, driving license leh Mizoram University grade card lem, pakhat Rs. 2000-in dan phalna tel loin a siam thin tih a inpuang a ni.
A mobile phone leh Lalneihpuia hi man a ni a. Amah hi Hnahthial district South Vanlalphai khawchhuak nia insawiin, dan anga hma lak chhunzawm turin thubuai siamsak a ni.
Hetianga mi bumna atana educational degree, professional certificate, signature adt. lem siam, tihdanglam hi dan bawhchhiatna pawi leh liantham tak a ni tih Mizoram Police chuan mipui an hriattir a. Mipui pawh document dik lo leh inbumna laka fimkhur tur leh hetiang dan bawhchhiatnaa inhnamhnawih lo turin mipui an chah tih a sawi.