Doha khuaa century siam tum Djokovic

Doha khuaa century siam tum Djokovic
Australian Open campaign laia a hliam kha thawhsanin Novak Djokovic chuan tunthlaa khelh tur Qatar Open-ah hian a career-a a singles title 100-na a beisei dawn tih a sawichiang.
Chu hmachhawp chu hun rei tak atanga a lo um tawh a nih thu sawiin, a hlawhtling a nih chuan professional era-ah Djokovic hi singles title 100 la tling thei pathumna a ni dawn a, Jimmy Connors (109) leh Roger Federer (103)-te hnung a zui ve dawn a ni.
Mipate zinga vawi 24 Grand Slam champion ni tling awmchhun Serb hian thla hmasa Melbourne tournament-ah khan semi-final match pakhat zawka Alexander Zverev a hmachhawn laiin a kaihza tha a tina a, khel zo thei loin a inhnuhdawh phah ta nghe nghe a, Melbourne Park-ah khan tennis player piang chhuak tawh zawng zawng zinga major title la hnem ber nih a tumna a puitlin zawh loh rualin ‘boo’ khum a la tawk ta dah kha a ni a!
Tunhnaia media lama a rawn inlan leh rualin German nen an inkhelh laia a kaihza veilam hliam awm dan nemnghettu MRI scan a lekchhuak a, a caption-ah harsatna a neih vanga inhnukdawk a nih thu a sawilang nghe nghe.
World number seven hi Serbia Davis Cup first-round qualifying tie atang pawhin a inhnukdawk a, an superstar tel loin Serbia kha Denmark lakah an tlawm zui ta a ni.
Tunhnaia Montenegrin daily newspaper Vijesti an tihin an kawmna an tichhuahah kum 37 mi hian a hliam tawh chu 100 percent-a dam tawh thu leh karleh Doha tournament-ah hian mellung thar phuna trophy 100 lak tlin a tum thu a sawi.
Qatar Open hi February ni 17-22 chhunga khelh tur a ni.
Nikum August thla Paris Olympics daih tawha a title 99-na thawkchhuak tawh Serbian hian nikum vek October thla khan Shanghai Masters kaltlangin century a siam teuh viau a, final-ah world number one Jannik Sinner a ngam lo.
Kumin Australian Open-ah Grand Slam title la hnem ber record siam paha title 100 hawn tlin a tumna a phet leh a, kum 2016 leh 2017-a a champion-na Doha lam a thlir zui leh ta phawt a ni.