Donald Trump-an State pathumah chakna chang zui

Donald Trump chuan US state dang pathumah Republican nomination a hmuh belh leh a.
US president hlui Trump chuan amah chotu Nikki Haley chu Idaho, Missouri leh Michigan caucuses-ah a hneh leh a ni.
Trump hian kum 2024 November thlaa inthlanna neih turah party official candidate nihna a hnaih tawh hle a.
Republican delegates 247-ah hnehna a nei tawh a, chutih laiin a elpui ber Nikkli Haley chuan 24 chauh a la nei thung.
Republican zinga Trump larna chuan kumin November thla inthlanna awm turah Joe Biden a khing ngei tura ngaih a ni a.
Super Tuesday hmachhawn mai a ni dawn bawk a, Super Tuesday ah hian State 15 in an candidate duh zawk an thlang dawn a. Super Tuesday-ah hian Republican delegates 854 laiin an tichiang dawn a ni.
Palai tih te hi an state or district aiawh an ni a, chung mite chu presidential nominee tur thlangtute an ni.
Kar kalta Inrinni khan Trump chuan Michigan-ah delegates 39 hmu in, Missouri ah 54 leh Idaho ah 32 a hmu a ni. Michigan caucuses ah hian district 13 a la fai vek a, battleground anga ngaiha a chak vek avang hian White House luah tura candidate a nih theihna kawng a hawng zau hle.
Caucuses leh primary te chu US state a political party tena an presidential nominee an thlan theihna kawng hnih a ni a. Caucus ang lo takin primary-ah chuan voters ten polling station-ah a rukin an mi duh an thlang thung.
State thenkhat Michigan te ang chuan Republican primary leh caucus an nei kawp a, a pahnihah Donald Trump chuan chakna a chang ve ve a ni. Nikki Haley tan chuan chak theihna a vang ta hle a sawi a ni.