Donald Trump chu US president ni tawh zinga thiltisuala thiamloh chantir hmasak ber a ni ta a. New York jury te chuan kum 2016 inthlan dawna porn star Story Daniels hnena ka hupna (hush money) sum a pek thup dana business document siam danglamah puhin thiamloh a chantir.
Donald Trump hremna tur hi 11 July ah puan a ni chauh dawn a, lung in a tang thei a, mahse, chu ai chuan sum a chawi rin zawk a ni.
Donald Trump chuan kum 2016 election dawn khan porn star Story Daniels nena mipat hmeichhiatna an lo hman tawh a sawi chhuah loh nan $130,000 pein chumi thup nan chuan document a siam danglam tih a ni.
Wall Street Journal chuan Trump chuan porn star Stormy Daniels hnenah October 2016 khan kum 2006 daih tawha Trump nena an mutdunna chungchang vel a sawi chhuah loh nan a ka thup nan sum a pe a ti a. Trump hian tuna a nupui Melanie Trump hi kum 2005 khan a nei a ni.
Trump chuan Stephanie Clifford, Stormy Daniels tia hriat lar zawk nen mipat hmeichhiatna an hmang lo tiin a tangkawh ve tlat thung.
Trump lung inah a tang ang em?
US President nih tuma hma la mek Trump chuan lung in a luh hmel loh thung a. Tuna Trump thiamlohna business record dik lo taka siam avanga hremna na ber chu kum 1-1/3 vel lung in tan a ni.
Mahse criminal history nei miah lo ni bawka bussiness record dik lo taka siamrem avang mai chuan New York ah lung in tang an awm ngai lo tluk tia sawi niin hremna lekkawhah sum chawitir emaw chu hman rim zawk a ni.
Sum chawitir ringawt aia naa hrem a nih chuan Trump chu a chenna inah hun eng emaw chen chhuak thei hauh lova siamin a awm thei bawk.
President hlui a nih angin a dam chhung chu Secret Service detail nei a nih avangin lung in a khung ringawt chuan awmzia a nei lo thei bawk. Chutihrual chuan Trump chu bail a chhuah ni thei bawkin a thubuaia thutlukna siam chu a khing let thei bawk.
Trump thiamlohchantir a nih theih nana pawimawh ber chu a lawyer hlui leh Trump nena intithiamlo zui Michael Cohen a ni a. “A tawpah chuan thudik lailanin a awm e. He thil hi America-in a mamawh tak chu a ni” tiin Cohen chuan a sawi zui a.
Cohen hian court hnenah Trump lawyer a nih lai ngeiin amah ngeiin porn star Stormy Daniels hnenah chuan ka hupna sum a pe tiin a sawi.
Trump hian thubuai dang kum 2020 election-a Biden a chakna chhan kha ruksak tumin a phiarru tih a la nei tho bawk a, chubakah chuan White House a chhuahsan pahin secret document a la chhuak ru tih thubuai a nei bawk. Mahse, heng thubuai te hi chu presidential election hma chuan ngaihtuah tak tak hman a nih a rinawm loh thung.
Court atanga Campaign
A thubuai ngaihtuah chuan Biden hneh tuma a campaign a tikhaihlak nasa hle a, mahse, court chu media te hip nan a hmang hlauh thung tho bawk.
Court-in thutlukna a siam hnu lawkah Trump chuan fundraising appeal siam nghalin ‘I am a political prisoner’ tih chu thupuiah a hmang zui a. Kar tin Zirtawpni ah journalist te hnenah public statement siam ziah a tum bawk.
Texas Christian University a professor ni lai leh political analyst Keith Gaddie chuan Trump thiamloh chantirna chuan politics-ah nghawng a neih dan tur hriatthiam a har rih a ti a.
“Voters tam tak te chu a tibuai dawn hauh lo va, state thenkhat swing voters tamnaah chuan nghawng a nei thui thei. A bik takin inhnehtawk zualnaah Trump tana pawi thei a awm” tiin a sawi.
Trump hian US president thlanah chakna chang mah se amah leh amah a inngaidam thei dawn chuang lo. A chhan chu a thubuai neih chu federal sorkar kalpui ni lovin New York state kalpui a nih vang a ni a, ngaidam theitu awm chhun chu Governor a ni.