Donald Trump-a’n thubuai neih belh zel

US President Donald Trump chu kum 2020 inthlana Georgia state inthlan result khawih danglam tuma puh a ni.
Hei hi president hlui Donald Trump-a’n criminal case pali a neihna chiah a ni bawk a. Trump hi kum 2024 Republican candidate ni tura hmahruaitu a ni mek a. Amah leh a thuihruai 18 lai te chu thubuai siamsakin an awm ta a ni.
Amah puhna thil hrang hrang 13 te chu a hnawl vek a, heng zingah hian election tihchingpen tumna te pawh telin chung amah puhna te chu politics thila amah tihchhiat tumna tiin a sawi thung.
Georgia prosecutor Fani Willis chuan Trump leh a thuihruai ten inthlan tihchingpen tumin chet an la tih hi February 2021 daih tawh khan chhuichianna a lo nei tawh a.
Thawhtannia phek 98 laia chhah puhna siam tihchhuahah prosecutor te chuan defendant 19 te lakah charges 41 lai an siam a ni.
Willis chuan defendants te chu voluntary-a inpek hun Friday 25 August thleng a siamsak thu sawiin puh 19 te hi an vaia khin vek an nih tur thu a sawi zui bawk a.
Co-conpsirator zingah hian Trump lawyer hlui Rudy Giuliani, White House chief of staff hlui Mark Meadows leh White House lawyer hlui John Eastman te pawh an tel a ni.
Anni bakah hian justice department official hlui Jeffrey Clark bakah Trump lawyer hlui pahnih Sidney Powell leh Jenna Ellis te pawh an tel.
Puh an nihnaah heng mite hian ‘hre reng chung leh an duhthlanna ngeiin Trump a chak theih nan inthlan result khawih danglam an tum a ni’ tiin puh an ni.
Thubuai siamsak an nihnaah defendants te chu ‘criminal organisation’ tia puh niin hei bakah hian witness te hneh tum tih te, computer khawih danglam tum tih te leh thil pawimawh tihkhawloh tum tia puh an ni bawk a.
Trump laka thubuai siamsakah hian Georgia racketeering act bawhchhia tih te, public officer nihna thutiam bawhchhia tih te, public officer lemchang tih te, bumna kalpui tum tih te leh document-ah statement dik lo ziak tih te a tel.
Puhna siam zinga hautak ber tura ngaih chu Racketeer Influenced and Corrupt Organizations Act (Rico) Act niin kum 20 lung in tan theihna a ni bawk.
Trump campaign team te chuan thuchhuah an siamah district attorney chu ‘thleibik nei’ tia sawiin kum 2024 inthlan neih tura inrawlh tuma Trump campaign tihchhiat tum tiin an puh let ve thung a.
“Awmze nei taka tuna chetlaka hmang hian Democratic jurisdiction te hian American mipuite rinna an phatsan a ni mai lo va, dik lo taka midang an puhna dik tak te lailanin a awm phah zawk a ni,” tiin Trump campaign thuchhuah chuan a tarlang a. Tihian Trump hi US president hlui zinga cirminal charge siamsak hmasak ber a ni zui bawk.
Tun thla tir lam khan Trump chu Washington DC-a federal prosecutor te chuan kum 2020 inthlan result khawih danglam tumah an lo puh tawh bawk a, kha inthlanah khan Democrat candidate Joe Biden a hneh lo a ni.
Tuna Willis investigation hi chuan Georgia state bik thlurbingin US presidency thlanna neiha key battleground tih niin inthlan hnuhnung berah khan vote tlem te in Trump a chak lo a ni.
January 2021 khan Trump chuan khatih laia Georgia Secretary of State Brad Raffensperger chu phone a biaka Biden hneh theih nana vote mamawh 11,780 hmu tura a tihna chu a putru tawh bawk a ni.
Trump hian New York state-ah pawh thubuai neiin, porn star Stormy Daniels laka ka hupna sum pea puhnaah nakum March 25 -ah a inlan a la ngai dawn bawk a. May 20-ah a chenna Mar-a-Lago a classified document hmuh a nihna kaihhnawihah Florida a thubuaiah a inlan a la ngai dawn bawk.