Donald Trump man, chhuah zalen nghal
Donald Trump chuan porn star hnena ka hupna sum pek chungchanga thubuai siamsak zui zelah criminal prosecution chu na taka beiletin ‘kan ram hmuhsitna a ni’ ti hialin a sawi.
Kum 76-a upa US president hlui chuan felony count 34 ah engmah thiamloh a neih loh thu sawiin tichung chuan American president ni tawh zinga criminal trial hmachhawn hmasa ber a ni thung.
“Hetiang thil hi America-ah a thlan ka ring ngai lo va, a thlen ka ring ngai lo takzet a ni,” tiin Trump chuan southern Florida-a a chenna Mar-a-Lago-a amah lo hmuaktute hnenah a sawi a.
“Tihsual ka neih chhun chu kan ram tihchhiat tuma beitute laka hlauhna nei lek lova kan ram ka chhan zawk hi a ni a. Kan ram hmusit tute an ni,” tiin a sawi.
Trump chuan ‘radical left’ prosecutor te chuan engti kawng zawng pawhin eng pawh huamin amah tihchhiat tumin chet an la dawn tiin a sawi bawk.
Court-a rorelna neihah Manhattan prosecutor thung chuan ‘Trump chuan a New York business record te chu dik lo takin dan kalha a chetna thup tumin chet a la a ni’ tiin a sawi.
Trump puhnaah hian porn star hlui Stormy Daniels hnena ka hupna sum pek te leh playboy model hlui Karen McDougal hnena sum pek te leh Trump Tower doorman hluiin Trump chuan midang lakah fa a nei tih te an sawi chhuah loh nana an ka hup nana sum pek te a tel.
Daniels hnenah hian Trump lawyer ni thin Michael Cohen chuan $ 130,000 a pe a, McDougal hnenah hian $150,000 leh Trump Tower doorman hnenah hian $30,000 pek a ni tiin AMI leh tabloid National Enquirer te chuan an sawi a.
Trump chuan New York court a inlana Florida a pan hmain president nih tuma a campaign-na fundraising emaila thawnchuhahah $10 million a hmuh nghal thu a sawi thung a. “American history a hun thim ber lai kan tawn mek laiin kei erawh phur takin ka awm mek a ni,” tiin Trump chuan a sawi.
Trump thubuai
US President hlui Donald Trump chu sumdawnna kaihhnawih 34 laia ah thil tisuala puh niin man a ni zui a.
White House-a kum li tal tawp hun hmanga American president ni tawh hi Thawhlehni khan court-ah hruai niin amah puhnaah thiamlohna engmah a neih loh thu a sawi thung a.
Heng a thubuai neih leh an puhna te hi kum 2024 inthlanna neih tura president nih tuma hma a lak mek laia thleng vek a ni.
Thawhlehni khan Trump chu court-ah kalin man zui nghal a ni a, felony counts 34 ah thubuai siamsak niin amah thubuai an siamsaka puhna hi phek 16 laia chhah a ni.
Chung zingah chuan adult film actress Stormy Daniels, mipat hmeichhiatna a hmanpui ka hup nana $130,000 a pek te pawh a tel a.
Stormy Daniels hnenah hian Hillary Clinton hneha 2016 election hma ni 12-ah sum hi a pe nia puh a ni.
Court chuan chhah zalen zui nghal thungin court a chhuahsan hnuah Florida a chenna in a pan nghal a, chutah chuan amah thlawptu mi tam takin an lo hmuak thung.
Trump puhna te?
Stormy Daniels chuan kum 2006 khan Trump nena an inkawp thu sawiin hei hi Trump chuan a pha reng thung a.
Kum 2016 khan Stormy Daniels chuan Trump nena an chetvel dan chu media hnenah hralh a tum thu a sawi a, hetih veleh hian khatih laia Trump lawyer Michael Cohen chuan Daniels ka hup nan hian $130,000 a pe zui a ni.
Ka hupna pawisa inpek hi an kalh a ni lo va, mahse, buaina awm ta zawk chu Cohen an Daniels hnena ka hupna pawisa a pek a hnua Trump an a rulh let lehna chu a account-ah record thlap a nih vang a ni.
Trump hian Cohen hnena sum a pekah hian dik lo takin legal fees atan tiin a ziak lang a, chutak chu dawt sawia puh a nihna chu a ni ta a ni.
District Attorney chuan sum inpek chu information thup behna tur leh kum 2016 inthlan hma leh hnua American voters te laka dik lo taka thiltihna tiin a sawi.
Trump-an jail a lut ang em?
He thubuai hi chinfel a nih hnuah pawh sum inchawitir baka a tawp a rinawm loha, chutih rual erawh chuan lung in tan theihna tham a awm tho bawk.
Busienss record dik lo taka siam leh tih hi dan kalh niin hremna na tak tawn theihna a ni a.
Mahse, Trump laka puhna kalpui mek hi chu New York-ah pawh felony category-ah a hniam ber pawl niin lung in a tanna thleng pawh ni se hremna na ber chu kum li lung in tan theihna a ni.
Thubuaiah hian Trump hian thiamloh chang ta pawh ni se lung in a tan erawh a rinawm loh tia sawi a ni.
President a la chuh theih tho ang em?
Thubuai siamsak pawh ni se US constitution chuan Trump chu election campaign a neih a khapsak lo. Lung ina tang pawh ni se, theory tak chuan president chuh theiin thlan tlin a la ni thei tho bawk.
Mahse, chung piahah chuan a taka thil awm thei ngaihtuah ngai a ni thung a. Dan hmanga inbeihna leh thubuai neih awh rei tak chuan a presidential campaign a tibuai thei a, hun leh tha heh dawn hlein harsatna namen lo a thlen thei thung.
A hmain Trump chhui chian a ni tawh em?
President a nih laiin Congress-in liantham tak thil pahnihah an chhui chiang tawh a, ban hial tuma hmalak ni mah se, US Senate chuan tum hnih lai a hnawlsak ve ve thung.
Tunah chuan president a nih tawh loh avangin impeached theih a ni tawh lo va, mahse thubuai siamsak theih niin criminal investigation a lakah kalpui theih a ni tawh thung a. Tuna a thubuai pawh hun rei tak awh thei niin court-ah ngaihtuah zui zel tur a ni bawk.