US President hlui Donald Trump chu Pennsylvania a rally neia thu a sawi laiin silai hmanga kahhlum tum niin a beng dinglam chunglam kah thlersak a ni.
Trump hi kun hniam zui nghalin US Secret Service agents te chuan an hual nghal a, stage atanga chhukpui niin lirthei chhungah luhpui nghal a ni a. Stage atanga chhukpui a nih dawnin Trump chuan a kut dinglam humruhin mipui lam a vai a ni.
FBI te chuan Trump kaptu chu Bethel Park, Pennsylvania a cheng Thomas Crooks a nih thu sawiin kum 20 mi lek a ni bawk.
Truth Social network-ah Trump chuan silaimu chuan a beng dinglam chung ‘a tai thler’ tiin a sawi lang a. Local medical centre ah a hliam te enkawl nghal a ni bawk.
“Ri deuh mum mum ka hria a, thil dik lo a awm tih ka hre nghal a, kahin ka awm a, silaimu in ka vun a tai thler tih ka hre nghal a ni,” tiin Trump chuan a ziak a. “Thisen a chhuak nasa a, eng nge thil thleng ka hrethiam zui chauh a ni,” tiin a sawi.
Protection officer ten Trump an khawm lai hian Trump-a beng leh hmai velah chuan thisen a luang deuh nguai a.
Trump kaptu chu US Secret Service officer ten an kaphlum nghal a. Agency thupuangtu Anthony Guglielmi chuan inkahnaah a bul hnaia awm mi pakhat kahhlum niin midang pahnihin hliam na tak an tuar a ti bawk.
Law enforcement te chuan Trump kaptu Crook chuan rifle hmangin rally neihna atanga hla lote hmun dawhsan deuh atangin a kap an ti a.
Crook hian ID engmah a keng lo va, investigator te chuan tu nge a nih hriat nan DNA an hmang a ni.
Kumin November US President thlanna neih turah Pennsylvania chu swing state pawimawh ber pakhata ngaih niin Trump hian thu a sawi tan chauh tih hnuah kahin a awm a ni.
Kah a nih hma hian Trump chuan amah thlaktu leh President ni mek Joe Biden leh a administration chungchang a sawi lai a ni a. Trump hnungah amah thlawptute an thu teuh bawk.
Mita hmutu pakhat Greg chuan Trump an stage a luah hnu lawk minute nga vel lekah mi rinhlelhawm tak chu building chungah a bawkvak lai a hmuh thu sawiin police te hnenah a hrilh nghal thu a sawi a.
“Rifle a keng a, a rifle ken nen chuan chiang takin kan hmu a ni” a ti a. “Amah kan kawk a, police te chuan rang takin an pan nghal a ni,” tiin a sawi.
US President Biden chuan a home state Delaware atanga thusawina a neihah Trump beihna chu ‘sick’ tiin a sawi a. “Hetiang tharumthawhna hian America-ah hmun a chang lo. Tute pawhin kan dem a ni,” tiin a sawi.
White House chuan President Biden chuan Washington DC a pan hmain Trump phon-a a biak thu an sawi bawk a.
Trump leh Biden te hi intiat tawk taka ngaih niin kum 2020 election re-match an nei leh dawn a ni.
US President hlui Barack Obama chuan ‘kan democracy-ah political violence-in hmun a chang lo’ tia sawiin, Trump in hliamna a tuar lo chu a lawm thu a sawi bawk.
Trump-a vice president hlui Mike Pence chuan a nupui nen Trump chu an tawngtaipui thu sawiin ‘American tin ten min zawm ve rawh u’ tiin a sawi.
House Minority leader Hakeem Jeffries pawhin thuchhuah siamin, “President hlui Trump kan ngaihtuaha kan tawngtaisak bawk. Law enforcement te chet lak vatnaah lawmawm ka ti a. America hi democracy a ni a, political violence eng chi mah pawm theih a ni lo” tiin a sawi.
UK Prime Minister Sir Keir Starmer pawhin President Trump rally-a inkahna thleng chuan a tithlabar takzet tia sawiin, “Political violence eng chi mahin kan society ah hmun a chang lo” tiin a sawi.
Japanese Prime Minister Fumio Kishida pawhin mipui te chu ‘democracy chotu’ tharumthawhna te hnawla do turin a ngen bawk.
Canadian leader Justin Trudeau pawhin President Trump kah a ni chu a dem thu a sawi bawk.
Hetih lai hian Thawhtanni hian Trump chuan Milwaukee a convention neihnaah Republican party in president atana nomination chu a pawm dawn nia sawi a ni a. He hunah hian a running mate tur pawh a puang dawn nia sawi a ni.
Republicans tam tak chuan Preisdent Biden chu inkahna thlengah an dem thu sawiin Trump a president nih leh hlauhawmna lam aupuiah leh tipunlunah an puh a ni.
Senator JD Vance, Trump vice-presidential candidate ni thei tura shortlist zinga mi chuan, Biden campaign tawngkam awmze nei takina tun inkahna hi a thlentir a ni, a ti.
Republican Congressman Mike Collins pawhin president Biden chu tun inthah tumna thleng thlentu hi a ni tiin a sawi bawk.
-- Advertisement --
Hlauhthawn thleng dik
US lawmaker leh analysts tena an hlauhthawn em em chu Donald Trump-an Pennsylvania rally a neihnaah a thleng dik ta tih niin kum 2021 US Capitol riot atang khan US-ah campaign language te thlengin tharumthawhna thlen thei tur anga kalpui nasat a ni an ti.
Kum 2022 pawh khan khatih laia House speaker Nancy pelosi pasal chu far-right conspiracy theorist ten tuboh hmangin an bei chiam tawh a.
Trump kaptu kum 20 leka upa Thomas Matthew Crooks political affiliation leh eng rilru puin nge chet lak tih chu la chiang lo mahse analysts leh politician tam tak te chuan US-a political tawngkam duhthawhna zual zel hrin a ni, an ti.
“Kar tam tak chhung chu Democrat leader te chuan Donald Trump a president leh a nih chuan America a democracy tawpna tur a ni ang tiin thu an vawrhvir a ni” tiin House Republican Majority leader Steve Scalise chuan a sawi. Scalise pawh hi kum 2017-a congressional sports event a mass shooting thlenga hliam tuar tawh a ni.
“Tun hnaia tharumthawh lam hawia tawngka neih chu far left lunatics ten chet an lakphahna a ni tih kan hmu chiang ta a. Hetiang lam hawia insawiselna hi kan tihtawp a ngai,” tiin a sawi.
Senior Trump campaign aide Chris LaCivita chuan ‘leftist activists, Democrat donor leh Joe Biden ngei pawh’ an tawngkam hman te chu a sawisel a.
Kum 2016-a Green Party candidate Jill Stein running mate Ajamu Baraka chuan Democratic ho tawngkamte chu he silai hmetpuaktu hian la fuhin ‘ram tana hlauhawm nuaibo chu ram leh hnam hmangaihna thiltih’ angin a ngai a ni thei tiin a sawi bawk.
Donald Trump ngei pawh US politics a tawngkam duhtui lo taka insawisel vak vaknaah a ti nasa ber pawl a ni tho bawk.
Trump chuan natak takin Congress leh sorkar mai bakah Republican Senator Mitt Romney atanga retired top government scientist Anthony Fauci te thlengin a bei chiam chiam thin a, hei vang hian Trump supporter te atanga kutthlak an nih hlauvin private security an ruai hial hlawm a ni.
Trump ngeiin nikum pawh khan US top military officer chu tihhlum tlak tia a sawi avangin inhnialna a siam vak tawh a, Pelosi Hammer attack pawh fiamthu thawh nan a hmang tawh bawk.
Tharumthawhna tipunlun thei zawnga thusawi chu Trump tan thil thar a ni lo va, a tih fo a ni zawk. Kum 2020 a George Floyd police ten an tihhlum laia lungawilohna thlengah pawh Trump chuan chu mi remchanga laa thil ruk ching te chu kahhlum tur a ti tawh bawk.
Chu mai bakah civil leh criminal case a awrh mek ngaihtuahtu attorney te chu ‘monster’ tih te, ‘deranged’ leh ‘psycho’ tih tein a sawi a ni.
January 6, 2021 a amah thlawptu tena US Capitol an luhchhuah hma pawh khan amah thlawptute chu turin ‘fight like hell’ tih tawngkam a hmang a, kha thil thleng avang khan mi pangain nunna an chanphah a ni.