DoNER hotu in Thenzawl Peace City ruahmanna en

DoNER hotu in Thenzawl
Peace City ruahmanna en
Sawrkar laipuia DoNER secretary Chanchal Kumar, IAS chuan Mizoram a rawn tlawh a, Zirtawpni khan chief minister Lalduhoma nen an inkawm bakah Serchhip district tlawhin, Thenzawl Peace City ruahmanna pawh a enpui.
Chief minister hian DoNER-a Mizoram sawrkar project inchiah mek (pending projects) chu a ranglama chinfel sak turin a lo ngen a. Sum sanction chhung rei thin chuan hnathawhna lamah nghawng a neih avangin tihtawi dan ngaihtuah a tul tih a sawi a ni.
DoNER secretary hian Mizoramin tunhnaia sawhthing sawngbawlna hmun a nei thar chu a lawmpui tih chief minister hi a hrilh a. Sawhthing chu Mizorama loneitu tam tak innghahna a ni a, an tharchhuak tam chho zel bawk a. A processing unit lam hi DoNER chuan a ngaipawimawh hle tih a sawi a ni.
Thenzawla Helipad and Heliport siamna tur, Thenzawl Peace City Greenfield Development siamna tur leh Thenzawl Venghluna Handloom Cluster a tlawh a. Thenzawl Golf Course & Resort-ah Peace City hnuaia hmalakna pakhat Greenfield Development siamna tura hmalakna, power presentation hmangin IPE GLOBAL chuan an hrilhfiah a. Thenzawl Vengthara Helipad & Heliport siamna tur a hmunah a enfiah bawk.
DoNER secretary hian Serchhip tlawhin Kawlri tlanga Cultural Heritage Centre sak mek a tlawh bawk a. Zirtawpni zan kha Thenzawlah riakin, vawiin – Inrinni hian Sairanga Ginger Processing Unit bakah Vairengte- Sairang road four lane laih mek a tlawh ang.