Donnarumma hmaiah an rah sak!

Donnarumma hmaiah an rah sak!
Nilaini zan Ligue 1 match-a 4-2-a mualneitu Monaco an hneh tumin Paris St-Germain goalkeeper Gianluigi Donnarumma chu first half laihawlah thlak vang vang ngai khawpin Monaco defender Wilfried Singo chuan a boot hlingin a hmaiah tak a rah sak sawk a, Italy international hmai kak hi hmun 10 zetah an chilh sak!
Singo pheikhawk chhuat a hnim hnaih hle lai hi goal awm loa team pahnih innawrtawn lai niin, minute 22-ah Donnarumma hi Matvey Safonov chuan a thlak a; a ke lek dan kha rapawm viau mah se a tihluih a nih miau loh avangin Singo khan hremna a tuar lo.
PSG boss Luis Enrique chuan inkhelh banah referee thutlukna siamah sawi theih a neih loh thu sawi chungin kha ti ang thil kha hmuh harsa a tih thu leh loh theih loha hmuh a ngai pawhin hrehawm a tih ngawih ngawih thu a sawi a; player-te’n tum luih vang reng ni loa mi an hliam palh changin referee-te tana thil a harsat ve tho thu leh chu mi vanga thutlukna (refereeing work) chungchang sawi a duh ngai loh thu a tarlang tel.
Inkhelh bana thuchhuah an siamah PSG chuan an goalkeeper hliam dinhmun chu Ningania endik a nih tur thu leh ni engemawzat a chawlh rih tur thu an puang.
Nilaini zan inkhelah Desire Doue chuan an keeper chhuah hnu lawkah Paris St-Germain hmahruaina goal khungin, mikhual team-in half time-ah sikhat faiin hma an hruai phawt.
Second half tir lama Eliesse ben Seghir-a penalty pet luh leh Breel Embolo goal hmangin Monaco lamin 2-1-in hma an hruailet ve thung a; mahse, Ousmane Dembele goal hnih leh Goncalo Ramos-a goal khat tauhluh hmangin Paris lam hian an chhanglet a, PSG hian point 10-a hma hruai fal chungin Krismas chawlh an hmang thei dawn ta a ni.