Dortmund lakah United an tlawm

GIG Motors I-Day Football Tournament chu thawhlehni khan RG Stadium-ah khelh chhunzawm a ni a. Group B atangin Mizoram Police FC leh Chhinga Veng FC ten hnehna an chang.
Thawhlehni chawhma dar 11:00 khan Mizoram Police FC leh Chawnpui FC te an inhmachhawn a, inkhel hmuhnawm takah si an phurh hmasak zet hnuin Police team in 3-2 in hnehna an chang let.
He inkhel hmuhnawm tak, goal nga ngawt luhna inkhelah hian minute 15-naa Lalhmangaihsanga goal thun hmangin Chawngpuiin hma an hruai. Chawlhlawk dawn hnaih minute 38-naah Police team hian penalty an hmu a, penalty hi Lalbiakhlu-a’n pet goal in an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah Chawnpui bawkin goal an thun hmasa leh a, minute 66-naah Lalrosang-a’n hma an hruai nawn lehna goal a thun. Si an phurh nawn leh hnuin Police team in an khel tha zui ta viau a, hun tawp dawna goal hnih an thun hmangin hnehna an chang let ta daih.
Minute 83-naah goal thun tang Malsawmfela’n goal thunin an si phurh a sut a. Sawmfela goal thun atanga minute li hnu lekah Lalfakzuala zuala chuan hma an hruai letna goal a thun zui leh zat a, ropui takin hnehna an chang let zui ta a ni.
Chawnpui leh Mizoram Police FC te an inkhelh zawh hnu, chaw hnu dar 1:00-ah Chhinga Veng FC leh Project Veng FC te an inkhel chhunzawm ve leh a. Inkhel hmuhnawm takah 4-2 in Chhinga Veng FC an chak.
Chhinga Veng FC tan hian MS Dawngliana chuan goal thum thunin hattrick a siam a. An goal khat dang hi Johny Lalremruata thun a ni. Project Veng FC tan hian MS Dawngzuala leh R Lal-chawikima ten goal an thun bawk. Inelna hi ninganiah neih chhunzawm a ni ang a. Chhun dar 12:00-ah FC Venghnuai leh Chanmari FC te an inkhel ang.