Dream quarter-final ; Spain vs Germany

Germany khawpui hrang hranga khelh mek Euro 2024 hmawrbawk a hnai zel a, zanin atangin quarter-final khelh tan a ni dawn. Zan dar 9:30-ah final ai pawha hmuhnawm hial zawk tur Spain leh Germany an inkhel ang a. Zanlai dar 12:30-ah Portugal leh France an inhmachhawn zui ve leh ang. Football ngainatute tan zanin hi men rei zan a ni dawn a, men rei a man hla ngei ang.
Beisei anga khel Spain
Stuttgart Arena-a inhmachhawn tur Spain leh Germany te hi Euro-ah vawi thum ve ve champion tawh an ni a, inelna neih mekah champion tura rinkai an ni dun mek bawk. An inkhela chak zawk zawk hian champion theihna hun tha tak an nei ang a. Tu emaw zawk zawk hi an champion a nih chuan Euro-ah vawi li champion thei hmasa ber niin record an siam ang. Vawi thum champion tawh rau rau ah Germany hian Euro-ah hnuhma an nei tha zawk a, final vawi ruk khel tawhin, vawi thum an chak a, vawi thum dang an tlawm. An mualah ngei inkhel tur an nih vangin champion theihna hun tha tak an nei.
Spain hi Group harsa ber tura ngaih Group B atanga tlang an ni a, group match ah chak vek thei awmchhun an ni. Team lian Croatia leh Italy an hneh hnuin Albania chu an B team ten an hneh ve leh. Last 16-ah Georgia an hmachhawn a, own goal vangin goal chhuah hmasa mah se 4-1 in hnehna an chang let a, phu taka hnehna changin quarter-final an lut. Quarter-final an luh thlengin goal 9 an thun a, goal khat chiah an chhuah.
Luis de le Fuente enkawl Spain hian player an nei tha hle a, position tinah world class player dah tur an nei a ni mai lova, an bench a mite pawh Croatia nena inhnehtawk Albania hneh thei khawpa tha an la ni cheu. Tunlaia defensive midfielder tha ber ang hiala ngaih Rodri an nei a, Rodri an nei hi team dang aia an danglamna leh an chungnunna a ni. Rodri hi Spain game tempo vawngtu a ni a, mamawh hunah game a pawt muang a, a tul hunah game a pawt rang leh mai thin. Rodri-a’n khuang a ben ran leh Spain leh an khingpuite an lam rang a. Khuang a ben muan leh a lam muang ve leh a ni deuh mai ber.
Spain manager Luis de la Fuente hi khingpuite nawr nawm timi a ni a, 4-3-3 formation a hmang uar hle. An khingpuite a zirin 4-2-3-1 formation a hmang bawk thin. An khingpui turte hi Germany an ni miau mai a, 4-2-3-1 formantion a hmang a nih pawhin a mak lo ang. EPL si nghak tha ber David Raya aia a rin zawk Unai Simon a lut lehin a rinawm a. Tlarhnungah Carvajal, Le Normand, Emeric Laporte leh Cucurella te an inkawp lehin a rinawm. Chelsea defender Marc Cucurelle hi Spain defender zinah cuan thin tiphu rang deuh ber a ni a, mah se inelna neih mekah rin phak bakin a chetha teh tlat thung.
Muallaiah an inngahna pawimawh tak Rodri chu a laiah a awm ang a, Rodri zirah Pedri leh Fabian Ruiz te awmin, tlarhmaah rawlthar duhawm pahnih Lamine Yamal leh Nico Williams ten tawnhriat ngah Alvaro Morata an kar cheh ang. Kum naupang te, ball thiam, tlan chak bawk si Nico Williams leh Lamine Yamal te hi Germany tlarhnung tan an hnawksak ngei ngei dawn.
Spain hi Euro 2024 ah ram lian zinga beisei phak anga khelchhuak a, result nei tha ber an ni a tih ngam. Group match an khelh hmasak ber atanga last 16 an khelh zawh thlengin an game a nghet a, an tlarhnung a phui laiin an tlarhmate an hrang a, goal an thun thei viau. Champion phu ber ti pawhin an sawi ngam awm e.
Spain hi Euro-ah vawi thum an champion tawh a, Euro a champion zawn thei hmasa ber an ni. An champion hmasak ber 1964 khan final-ah champion lai USSR an hneh. 1964-a an champion hnuin an champion zui thei lo ngar ngar a, kum 2008 khan an champion leh ta nawlh. 2008-a an champion kalkawngah champion lai Greece an hneh. Champion lai an hneh tumin vawi hnih an champion tawh. Inelna neih mekah hian champion lai Italy an hneh tawh a, hei vang hian an champion kum a nih mai pawh a rinawm viau. Mah se, an tum turte hi Germany an ni miau mai a, sawi huai ngam a har a ni e!
German ral lian
Euro a hnuhma nei tha ber, engtik lai pawha team tha ber pawl ni thei deuh reng mai Germany in Euro 2024 an thleng a, an ramah an che tha hle. German ral lian hi last 16 thlengin dang an la awm thei lo.
Germany hi Spain ang tho a team tha, player hrawl tak tak nei an ni a, an squad-ah hian kum upa, tawnhriat ngah tawh leh rawlthar tuai tir an inpawlh mawi hle. Chetha tura ngaih Jamal Musiala a chetha a, Toni Kroos pawhin beisei a phak viau bawk. Rinlawk angin an tlarhnung a phui tha a. Beisei phak bakin an forward Kai Hacertz a chetha teh tlat bawk. Euro 2024 khelh mekah beisei ang a khelchhuak team lian pahnih zinga pakhat an ni.
Germany hian 5-1 ngawta Scotland an sawp hnuin 2-0 in Hungary an hneh zui leh a, last 16 lut hmasa ber an ni. Group match hnuhnung bera an khingpui Switzerland lakah tlawm an pumpelh hram thung. last 16-ah Denmark nen inkhel hmuhnawm tak an lantir a, si hnih faia hnehna chang lehin quarter-final an lut. Quarter-final-ah Spain ber kher an hmachhawn tur erawh hma an ti ve det mai thei. Quarter-final an luh thleng hian goal 10 an thun tawh a, goal hnih an chhuah tawh thung. Hei hian goal an thun thei a, an tlarhnung pawh a phui tawk viau tih a tilang thei awm e.
Spain in Rodri an nei ang thoin Germany pawhin Toni Kroos an nei. Midfielder tawnhriat ngah, ball thiam leh thluak fim Kroos hi an inghahna ban rinawm a ni. Euro atanga an tlak rual ruala football chawlhsan tur Kroos hi Germany game tempo vawngtu a ni a, khuang a ben ran leh an lam rang a, a ben muan leh an lam muang mai thin. Chu chu Spain lakah pawh kan hmuh leh a rinawm.
Euro 2024-a manager naupang ber Julian Nagelsmann hian 4-2-3-1 formation a hmang uar hle a, Spain lakah pawh a hmang leh tura ngaih a ni. Yellow card a hmuh zawn vanga Denmark hmachhawn thei lo Jonathan Tah a kir thei tur hi Germany tan chanchin lawmawm a tling. Tah bak hi chu Spain an hmachhawn hunah player a thlak danglam chiam a rinawm loh.
Head to head
Spain leh Germany te hi inelna hrang hrangah vawi 26 an inkhel tawh a, chak tam zawk Germany vawi 9 a chak tawh a, Spain hian vawi riat hnehna changin, vawi 9 a inhnehtawk tawh bawk. An hnuhma en hian an inhnehtawk thinzia a hriat theih.
An intum hnuhnung vawi ngaah vawi khat ve ve an chak a, vawi thum dang an inhnehtawk. Germany laka Spain chak hnuhnun ber tum chu 17 November 2020 a ni a, UEFA Nations league-ah 6-0 ngawtin an sawp. Spain laka Germany chak hnuhnun ber tum chu 18 Novem 2014 a ni a, International friendly-ah 1-0 in an chak. Inelna liana an intum hnuhnung ber chu Euro 2008 final a ni a. Final hmuhnawm takah minute 33-naah Fernando Torres goal thun hmangin Spain an chak a, an champion. 2008 final rematch kan hmu dawn a, Germany in an mualah phuba lak an tum dawn a. Spain hian an lawn tawhna zawngtah kungah lawn nawn lehin, chak nawn leh an tum dawn a, inkhel hmuhnawm a ni dawn tih hi chalkawlh pen ang fawka chiang a ni.
Spain leh Germany te hi football ram ropui, tualchhung league ropui tak nei an ni a, player pawh an nei tha dun viau. Player nei tha tak an neih vangin inkhel a hmuhnawm a nih khawvelin a beisei a, kan beisei thlawn a rinawm loh. Spain hi ball thiam leh che rang, mawi leh dik tak taka ball inpe kual zung zung thin an ni a. He an thiam thil hmang hian an khingpuite an chhaihbuai a, hmunawl insiamin goal an thun leh mai thin. Germany lakah hian technicaly leh tacticaly in an chungngun zawk a rinawm a. Physicaly leh Mentaly-ah Germany a hnufual zawk mai ang em a tih theih. Germany hian inelna thlengtu an nihna leh pumraw lian zawk an nihna chhawr tangkai ngei an tum dawn a, tharum hmachhuanin Spain an hmachhawn a rinawm. Chu chu inkhel tihmuhnawm tur a ni ang.