Drug Licence 53 paih tawh

Directorate of Health Services hnuaia Food & Drugs Administration Wing-in kuminah thla 10 chhungin damdawi zawrh phalna drug license an pek tawh zinga 55 an paih (cancel) tawh.
Food & Drugs Administration Wing chhinchhiah danin, drug licence an cancel zinga pariat chu ruihtheihthil kaihhnawiha cancel an ni a, danin a phal chin baka damdawi ruih theih chi lo zuar an ni. An zinga paruk chu Aizawl khawpui chhunga mi a ni a, pakhat chu Champhai district-a mi, pakhat dang chu Lawngtlai district-a mi a ni.
Licence hman dik loh vanga cancel 14 a awm a, mi 14-ah pawh hian an zinga paruk chu ruihtheihthil kaihhnawih tho a ni.
Food & Drugs Administration Wing hian damdawi zuar zingah dan pela damdawi zuar an awm leh awm loh an endik thin a, kumina licence an cancel leh a suspend tak te chu inspection an neihna atanga dan pela damdawi zuar ngei an ni tih an finfiah te a ni tih an sawi. Police leh Central YMA hnuaia ruihhlo dotuten ruihhlo an man atanga report an dawnte pawh an bawhzui thin tih an sawi.
An sawi danin, drug licence hmang sual nia hriatte hi an insawifiahtir phawt a, chumi hnuah an dinhmun azirin an licence tihtawp thin a ni. Licence hi a tlangpuiin kar khat emaw thla khat emaw suspend phawt a ni a, dan dik taka an sumdawn zui chuan suspend order hlih a ni. Cancel chhunzawm te pawh a awm.
Damdawi zuarte’n dan pela damdawi an hralh thin tlanglawn chu khuh damdawi te, Alprazolam, Diazepam, Tramnadol, Dicyclomine leh damdawi dangte a ni a, heng zingah hian khuh damdawi hi hman sual a tam ber an ti.