Dubai Crown Prince-in India tlawh mek

Dubai Crown Prince-in India tlawh mek
Dubai Crown Prince Sheikh Hamdan Bin Mohammed Al Maktoum-a chuan an ram mi pawimawhte nen Thawhlehni leh Nilaini hian India tlawhin India leh United Arab Emirates (UAE) inkara sumdawnna leh thil danga inkungkaihna tur thil an ngaihven dawn.
UAE deputy prime minister leh defence minister ni bawk, Sheikh Hamdan-a hi September thlaa Abu Dhabi Crown Prince, an ram lal ni mai tur, Khaled bin Mohammed bin Zayed Al Nahyan-a’n New Delhi a tlawh hnuah zin vein heng ram pahnih hian India nena inkungkaihna tha an dap zel.
Prime Minister Narendra Modi-a sawmna anga India tlawhtu Crown Prince hi an minister, sorkar mi lian leh sumdawng aiawhten an tawiawm a. Tun hi Dubai Crown Prince-in India a tlawhna hmasa ber a ni.
Thawhlehni khan Modi-a’n chhun chaw a fakpui a. Sheikh Hamdan-a hian External Affairs Minister S Jaishankar leh Defence Minister Rajnath Singh a kawm bawk.
Sheikh Hamdan-a hian Mumbai pawh tlawhin ram pahniha sumdawng hotu lawkte nen an inkawm dawn a. He inkawmna hian India-UAE inkara sumdawnna leh nakin zela kal dan tur an sawiho dawn tih ministry chuan a sawi.
Dubai hi India nena sumdawnna, nun dan leh mihring pawh inpawh tak a ni a. Ram danga Indian awm maktaduai 4.3 zinga a tel ber hi UAE cheng leh Dubai-a hna thawk an ni.
Kum 2022-a India-UAE comprehensive economic partnership agreement (CEPA) siam a nih hnuah khan ram pahnih inkara sumdawnna che hi $ tluklehdingawn 85 lai a tling tawh a. UAE hi India-in a sumdawnpui lian ber pahnihna niin US leh China dawttu a ni a, India-in a bungrua a thawn chhuah tam ber pahnihna a ni bawk.
UAE tan India hi a sumdawnpui lian ber pahnihna a ni ve thung a, ram danga a sumdawnna 9% chu India nena an inkar niin tuialhthei ni lo a thawn chhuah 14% leitu chu India a ni.
Thuneituten an chhut dan chuan UAE-in tuialhthei ni lo, thil danga India nena an insumdawn tawnna ni kum nga lo awm leh turah chuan $ tluklehdingawn 100 chuang a nih tawh an ring.
UAE hi India-a sum invest tam ber pasarihna a ni a, foreign direct investment (FDI) pawh April, 2000 leh September, 2023 inkar khan $ tluklehdingawn 16.67 a tling.