Duh reng chunga France squad luah lo Mbappe!
France manager Didier Deschamps chuan a zawna a vawihnihna atan Nations League-a Israel leh Italy hmachhawn tur squad-ah a captain Kylian Mbappe a ko lo leh a, a koh loh chhan sawi tel loin he match hnih atana ko lo mai a nih thu leh amah, Real Madrid forward chuan team-a kirleh a duh reng niin a sawi!
Tarlan tawh thin angin, kum 25 mi Mbappe hi October thlaa Nations League match hnihah pawh khan Israel leh Belgium hmachhawn thei lo zawngin France squad-ah a tel lo tawh a, kha mi tum kha chuan hliam atanga a kir hlim a ni a, ‘chawlhhahdamtir’ tih kha head coach chhuanlam niin a ngaih theih a, tunthla squad-ah erawh lang tawh ngei tura ngaih a nih laiin a hming hmuh tur a awm leh ta lo a ni.
Deschamps chuan, “Amah nen kan sawi dun a, he match hnih atan maia thutlukna siam ka ni,” tiin Ningani khan news conference-ah a sawi a, eng vanga a captain ber hnawl leh tlat nge tih erawh a sawilang tel lo!
Paris St-Germain chhuahsana free transfer-a Real Madrid a zawm hnuah French forward hi Bernabeu-ah a talbuai rih tlat a, La Liga club tana game 15 a khelh tawhah goal riat chiah la khungin, a inkhelh hnuhnung vawingaah vawikhat chiah goal a thun nghe nghe!
Kum 2018 World Cup champion Mbappe hian France tana match 86 a khelh tawhah goal 48 a tilut tling tawh.
France squad thar berah hian tunhnai Champions League match pakhata 3-1-a AC Milan an hneh loh tuma khelh Mbappe kohkan a nih rualin season liamtaa Champions League leh La Liga title changtu Real Madrid player hming pakhat a lang a, chu chu midfielder Eduardo Camavinga a ni.
Real hi tun season-ah an ropui rih lo a, thla hmasa mai khan an hmelma lianber Barcelona lakah sili fai tehrengin an tlawm a, league table-ah point kua ngawtin hmahruaitu Catalan-ho nen an inthlau tawh.
Lille goalkeeper Lucas Chevalier chuan a vawikhatna atan ram tana koh a hlawh a, Alphonse Areola hmun a luah.
Hliam avanga Aurelien Tchouameni a la bawksawp laiin Adrien Rabiot leh N’Golo Kante an kirleh.
Nations League Group A2 lama pahnihna luah mektu France hian game li khelh tawhah pahnihna luahin, an chung chiaha mi Italy lakah point khatin an hniam a; karleh Ningani khian Stade de France-ah Israel mikhualin, November ni 17-ah Italian-ho an luhkhung zui leh ang.
-- Advertisement --
France squad
Goalkeepers: Lucas Chevalier (Lille), Mike Maignan (Milan), Brice Samba (Lens)
Defenders: Jonathan Clauss (Nice), Lucas Digne (Aston Villa), Wesley Fofana (Chelsea), Theo Hernandez (Milan), Ibrahima Konate (Liverpool), Jules Kounde (Barcelona), William Saliba (Arsenal), Dayot Upamecano (Bayern Munich)
Midfielders: Eduardo Camavinga (Real Madrid), Matteo Guendouzi (Lazio), N’Golo Kante (Al-Ittihad), Manu Kone (AS Roma), Adrien Rabiot (Marseille, Warren Zaire-Emery (PSG)
Forwards: Bradley Barcola (PSG), Randal Kolo Muani (PSG), Christopher Nkunku (Chelsea), Michael Olise (Bayern Munich), Marcus Thuram (Inter Milan)