Daily Newspaper

DUHAMNA

72

(Engtia zau nge ram kan mamawh?)

-KL Rochama

Duhamna/Awhna tia Mizo tawnga Bible letlingtuten an dah hi Grik tawng “Pleonexi” atanga lehlin a ni a. Sap tawngin ‘Coveteousness’ emaw ‘Greed’ tia dah a ni. Pleonexi chu thumal pahnih ‘Pleon’ leh ‘Echein’ belhkhawm a ni a. Pleon chu ‘Tam zawk’ tihna a ni a, Echein chu ‘Nei’ tihna a ni. Pleonexi chu ‘Tam zawk neih duhna’ tihna a ni.

Hebrai tawng chuan Pleonexi sawi nan hian tawngkam hrang hrang an hmang a. ‘Thenawm nupui awt suh’ (Deut 5:21) tih nan ‘Hamad’ an hmang a. ‘Awhna’ hawtu erawh chuan a damchhung hun a ti sei ang’ (Thuf 28:16) tihah hian ‘Besa’ an hmang a. A awmzia chu ‘Hlepruk duhna’ (Desire for dishonest gain) tihna a ni. Tichuan, Duhamna chu mahni chantawka lungawi lo, midang chanvo chhuhsak duhna a ni.

Duhamna hi Eden Huanah a lo inlar daih tawh a ni. Adamate nupa chu Pathianin ama anpui ngeia a siam an ni a (Gen 1:27) Pathian anpui ngeia siam, Evi chuan Pathian an a lo chak ta tlat a. Eden huanah thing rah chi tinreng ei senloh a awm a. Huan laia thing rah, “I ei chuan, i ei ni la lain i thi ngei tur a ni” tih Pathianin a sawi chu ngainepin theirah chu a ei ta a, a pasal Adama pawh a pe ve a, Pathian an anna chu an lo hloh ta a ni. Adama te nupa thil tihsual pawizia hi khawvelin a la hre dawn chauh a ni.

Kan thupui kan luhchilh tak tak hmain Russia mi ziaktu hmingthang Leo Tolstoy-a’n “ How much land does a man need?” (Mihring hian ram engzata zau nge a mamawh?) tih a ziah hi thuhmahruai atan ilo thlir thuak teh ang.

He thawnthua a changtupa ber Pahoma chu an lal Kaisara (Tsar) chuan lengah a sawm a. Pahoma chu a tuk ni chhuah ruala hmun ruat atanga tlan tanin a tlan tanna chu ni tlak ruala thleng leh tur leh a tlan kual theih chin zawng ram chu pek a tiam a.

A tuk zingah chuan Pahoma chu zing takah a tho va. A tlan tanna tur hmun atang chuan ni chhuah rualin phur em emin a tlan ta a. Ram zawl tha em em, ni pawhin a chhun tlang theihloh khawpa ngaw dur pui hnuaiah chuan a ram neih tur ngaihtuah chungin hah pawh hre lovin theihtawpa chakin a tlan a. Nizungin ngaw kar a rawn chhun atang chuan ni a hniam hle tawh tih a hria a. Mahse, a zau thei ang ber ram neih a duhna chuan thahnemngaihna thar a pe a. Chau tawh hle mahse, a ram neih tur a ngaihtuahna chuan hah pawh hrechang lovin “An hour to suffer, a life time to live” (Reilote tuarna hian damchhung nun khaw nawmna min thlen dawn a ni) tiin tan a han la thar a. Ni tlak rual chiahin a tlan tanna hmun chu a lo thleng a. A tlu bawkkhup thuai a, a thi ta nghal a.

Tolstoya chuan, “Mihringin ram a mamawh chu : 6ft from his head to his feet (A thlan tur ram ft 6 a sei chiah a ni)” tiin a thawnthu ziah chu a titawp a. Ni, kan thlan tur bak ram kan lo mamawh hauh lo a nih chu! Spanish chuan, “ Mitthi ruang tuamnain (shroud) ipte a nei lo” tih thufing tawi an nei a. Joba chuan, “ Ka nu pum ata saruakin ka lo piang a, saruak vekin ka kir leh dawn a ni” a ti a( Job 1:21). Paula chuan, “Khawvelah hian engmah kan luhpui lo va, engmah kan chhuahpui thei dawn hek lo” a lo ti ve bawk a (ITim 6:7). Thi thei, thi ngei ngei tur, chatuan hmuna engmah chhawm thei kan ni lo tih hi beng hriatna chuan hre mah ila, sualin kan thinlung mit a tihdel avangin thi mai tura inngaih chu kan thei tlat lo. Rev. H.Killuaia chuan Theological College a kal laia a Thesis ziah tanpui turin Mizoram sawrkara Revenue Department- In-Hmun-Lo-Ram an pek dan zirchianna a nei tih min hrilh a. “Surveyor thenkhat chuan LSC 100 te zu nei a mawle!” a ti a. Surveyor chunga awm Officer te, MLA te Minister ten LSC an neih zat hriat a va chakawm em!

Bible chuan, “Mihring tan vawikhat (vawikhat chiah) thih ruat a ni, chumi hnuah rorelna a awm ang” (Heb 9:27) tih min hrilh a. I hlau emaw, hlau lo emaw, i inpeih emaw, inpeih lo emaw, i thi ngei ngei dawn. I thih hnuah Pathian rorelna hmaah he leia i damlaia i nundan chanchin (Account) i sawi ngei ngei dawn, pumpelh leh pehhel theih a ni dawn lo:

“Pathian rorelna thutphah hmaah kan vaiin kan la ding dawn si a…

Chutichuan, kan zain Pathian hnenah mahni chanchin kan sawi theuh tur a ni” (Rom 14:10,12)

Han ngaihtuah chiang teh. I rilrua i lo ngaihtuah thin zawng zawngte, i kaa ilo sawi tawh zawng zawngte leh i thil lo tih tawh zawng zawngte, mihring laka i lo zep ruk thinte kha Pathian ropuina engah chuan engmah zep theih a ni dawn lo. Unau duhtak, kei, mihring sawi dana Putar, kum 83-a upa, vawi tam tak Lal Isua phatsan thin, mahse min hmangaih em avanga Van Inlarnaa a kaihharh leh hian Krista thahnemngaihnain ka ngen a che : I Pathian tawk turin lo inpeih ang che aw.

He thu ka ziak lai hian tunhmaa Chorus kan sak thin ka hrechhuak a. Faifuka han sak ka tum a, ka lo faifuk thei tawh hauh lo mai a. Hei hi ‘Tar hri’ pakhat chu a ni awm e. Ka han ziakchhuak hram teh ang:

“With Eternity’s values in view Lord (v2)
May I know to live for Jesus,
With Eternity’s values in view”

He Chorus phuahtu hian Chatuan Hlutna thlir chunga Isua tana nun a chak a ni.

Duhamna chuan thutak a hliah thin. Duham avangin Pahoma chuan Chatuan Hlutna thlir thei lovin, damchhung rei lo te nawmsakna thlahlelin a nun a chân a. Bible chuan duhamna hi ‘Milem Biakna (Idology)’ a ti a (Kol 3:5). Chumi awmzia chu ‘Pathian hman tura mahni inpek aia mahni hamthatna atana Pathian hman tumna hi a ni’. Paula’n hun hnuhnung chanchin a sawinaah, “Pathian hmangaih aia mahni lawmna mai hmangaih zawktute an ni dawn si. Pathian ngaihsak anna an nei anga, nimahsela, a thiltihtheihna chu an awih lovang” (II Tim 2:4,5) a tihte kha an ni. Duhamna chuan mahni hmasialna a hring a, mahni hmasialna chuan Pathian aia mahni lansarh tumna leh Pathian ram zauna aia mahni hlawkna a zawntir thin a. Thutak aia Thilmak ngaihsanna a thlen thin.

Chhiarpui hnuhnungberah (2011) Mizoramah mihring 10,91,014 (Maktaduai khat singkua sangkhat) lek kan awm a. Kohhran hming invuah 70 chuang an awm a ni. Heti zozai kohhran pawl an awmna chhan hi Pathian thuin “Pumkhata” awm tura min hrilh engahmaha ngaih lohna a nih bakah ‘I ram lo thleng rawh se’ tih aiah ‘Mahni lansarhna’ khel an tam vang a ni thei awm e. Hei hi duhamnain a hrin a ni.

Mizoram sawrkar enkawltute pawh hian Pathian ram aiin anmahni ram an ngai pawimawh zawk fo va; mipui aiin anmahni leh an chhungte an ngaihsak zawk fo thin. Mi rethei, riltamin a thlawna dawn tur an inchuh luai luai han hmuhte hian lung a dam thei lo a ni. Han ngaihtuah chiang teh, Mizoramah chhungkua 2,22,853 (2011 census) kan awm a. Job Card nei 2,00,000 an awm zu nia! Sawrkar hnathawk, dawrkai leh contractor an vaiin chhungkaw 1,00,000 chuang an awm si. Mahni sawrkar neia kum 50 zet kan awm tawh hnuah hi chuan, ‘A tawk tawh’ tih nachang ram hruaitute hian hre teh se. Chutilo chuan, ‘Social Revolution’ kan tawng baw dah ange.

Pathian hi miretheite lamah a tang thin a nia. “Mirethei au thawma beng chhu ngawng chu, ani pawh a au vanga, nimahsela, ngaihthlaksak a ni bik lo vang” (Thuf 21:13) tih hi Pathian thu a ni. Isuan mi hausa leh Lazara chanchin a sawi hi Kristiante chuan kan hre bel hle a. Mi hausa hian pan bawm khah luk Lazara hi a ‘ngaithei’ a, mahse ‘a ngaihsak lo’ a ni. Hei vang hian Pathian chuan, “Mi a, zaninah hian i thlarau an laksak dawn che a ni; i thil dehchhuahte kha tu ta nge ni ta ang le? Mahni tana sum khawl a, Pathian lama ngah si lo chu, chuti chu an ni thin” (Lk 12:21,22) tiin Isuan lungchhiatthlak takin a sawi a ni.

France lal Louis XVI leh a nupui Antionette te chanchin hian i titawp teh ang. He mi te nupa hi Duhamnain a bual a a. Mipui riltam mangang, tihngaihna hre lo chu Paris khawpuiah kawng an zawh a, an au rual dual dual mai a. Lalnu chuan, “Chu, eng thawm nge ni?” tiin a khawnbawl upate a zawt a. “Chhang eitur an nei lo va, an riltam mangang au a nih chu” an ti a. Lalnu chuan, “Chhang an neih loh chuan Cake ei sela a ni mai alawm” a ti a. 1789 dar a lo rik chuan France mipui riltam thinrim chu an Lal leh a nupui bakah an sangawizawnpui, khawnbawl upate leh Kohhran hruaitute thlengin an ring an tansak vek a. France Revolution hian mipui tan zalenna a thlen laiin thinrim sosang phuba lak chaka tuihalte tan inhrikthlakna remchang a siam a. Madame Roland-i chu : “ O, Liberty, what crimes have been committed in thy name” tiin a tap hial a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy