Cambridge-ah Rahul-an BJP sorkar sawisel na hle

Congress leader Rahul Gandhi chuan Cambridge University-a lecture a neihnaah Centre chu na taka beiin Indian democracy bulthut te thlak danglam tumah puhin leh Israeli spyware Pegasus chu a phone enthlak nana hman a ni tiin a sawi bawk.
Gandhi chuan intelligence officers te chuan a phone a hman apianga fimkhur tura an hrilh thu sawiin a phone chu record sak a nih thu an hrilh thu a sawi a.
Cambridge Judge Business School-a Rahul Gandhi-an ‘Learning to Listen in the 21st Century’ lecture a neih hi Congress leader leh Prime Minister hlui Manmohan Singh advisor hlui Sam Pitroda chuan YouTube-ah a share nghe nghe a ni.
“Ka phone-ah Pegasus dah a ni a. Politician tam tak te phone-ah Pegasus dah ruk a ni. Intelligence officer ten phone-a i thusawiah fimkhur ang che kan record a nia tiin min hrilh,” tiin Rahul Gandhi chuan a sawi a.
Hetianga hualchepna hrang hrang hi kan tawk reng a, opposition ten case kan nei a, kei ngei pawhin criminal liable case tul hauh lovah ka nei nual a, hei tak hi kan duh loh em em chu a ni, tiin Congress leader chuan a sawi bawk.
Nikum August thla khan Supreme Court chuan India sorkarin inenthlak nan Pegasus a hmang tia puh chungchangah chhui chiang tur committee a din a, mahse, he spyware hi mobile phone 29 enfiahah hmuh a ni lo va, mahse, phone pangaah malware hmuh a ni thung.
He committee report chungchang hi sawiin Rahul Gandhi chuan, “Technical report an pekah khan ngaihthatlohna kan nei a. phone 29 enfiah tura pek an ni a, phone pangaah malware hmuh a ni a, technical committee te chuan chung te chu Pegasu tia sawi theih an ni lo an ti a ni” tiin Rahul Gandhi chuan a sawi bawk a.
Rahul Gandhi chuan Parliament, press leh judiciary te chu nasa taka nawrtawma an awm mek thu a sawi bawk a. “Tute pawhin chanchinthar hmangin indian democracy chu nawr tawm leh beih tawkin a awm mek tih an hria a ni. India rama opposition leader ka ni a, democracy a institutional framework pawimawh – parliament, free press, judiciary te chu nasa taka nawrin an awm mek a ni” tiin a sawi bawk a. “Indian democracy basic structure-in beih a tawk mek a ni,” tiin Congress MP chuan a sawi zui bawk.