Dul tih thep nana in tur tha

Nikhat thil thuah tumah an cher thut thei lo, kan ei leh in te hi taksa hriselna atan a pawimawh ang bawkin, rihna tihhniam duh emaw intih rih belh duh emaw te tan pawh ei leh in a pawimawh. Kan ei leh in a dik chuan kan metabolism a chak a, rihna kan paih chak sawt thin. Tun tumah hian chutianga metabolism tihchak nena thil in tur tha ni a Times of India health section-in a tarlan kan rawn chhuah chhawng e.
Ei leh in tur dik kan eiin kan in emaw a nih pawhin ei loh tur leh in loh tur te pawh kan hriat tel a ngai a, intihcher tumte tana tih hmasak ber tur chu thil thlum leh calorie pai tam chi te ei tlem tur a ni a, thei tui sawr thar in tam tur a ni. Thei tui hi in mai theih tura an pack sa aiin, a sawr thar hlim zel thlan zawk tur a ni a, vitamin, mineral, antioxidant leh fibre a pai hnemk a, chu chuan metabolism a tichaka, calorie kan paih chak phah thei bawk.
Khai le, eng nge in tur tha chu le? Carrot, serthlum leh sawhthing chawhpawlh tui in hian metabolism a tichak duh hle niin mithiam ten an sawi. Nutrient pai tam chaw an ni a, vitamin leh mineral chi hrang hrang, kan taksaa thau awm te control a, min ticher theitu an pai hnem.
Carrot, serthlum leh sawhthing chawhpawlh tui sawrah hian calorie a awm mang lo a, fibre a tam em em thung. Carrot-ah hian fibre a tam a, carrot tui sawr no khat tukthuan atan in la, chaw chhun ei hun thlengin a tipuar thei ang che. Carrot tui hian bile secretion a pui a, chu chuan thau a paih chak a, intih cher tumte tan a tha hle. Serthlum tui pawh hi negetive calorie juice an tih hial a ni a, sawhthing pawhin enzyme a pai hnem a, chu chu digestion tanpuitu a ni a, kan digestive system a that chuan intihcher a awlsam bik a ni.
Engtin nge i siam ang? Carrot pum khat chan sawm la, serthlum pum khat tui sawr la, sawhthing pum khat chan sawm bawk la, blender-ah carrot leh sawhthing chu her sawm la, a kawi that hnuah serthlum tui sawr pawlh leh a, chu chu in tur a ni. A thawh thah dan berah chuan zingkara in tur a ni a, i in zawh atanga minute 10-15 velah exercise i lak theih phei chuan a thalehzual dawn a ni.