Durtlang kawnga in sak tumna hmunah lei min leh

Bawngkawn to Durtlang inkara in sak tuma kawng chhak lei laih chetna chu June 29 khan a min a, June 30 thleng khan lirthei leh mipui veivak a la tibuai.
Thudawn danin Bawngkawn huamchhung, ‘Haflong’ an tih hmunah in sakna tur nia hriat, kawng chhaka lei lai lai chu Inrinni khan lei leh lung a tla pheuh pheuh reng a, Aizawl Traffic Police chuan helai kawng hi lirthei tana kharin, Bawngkawn atanga Durtlang lama kal duh tan pawh Thuampui lama kaltir an ni.
Haflong Welfare chairman Chawngnghinglova sawi danin, he in hmun neitu hi Lawngtlai lama sawrkar hna thawka awm a ni tih chu an hriat dan a ni a. Nikum December atang khan a laih hna hi thawh tan a ni a, in a sa zui mai dawn emaw tih laiin, a lai sang ta zel a, an ngaih a that loh avangin lai tawh lo tur pawhin Welfare lam chuan an lo ngen tawh a ni.
A laih tirh atang hian an ngaihven nghal a, phalna a hmuhna pawh an zawt thin a, phalna nei angin a insawi a, a tawpna nia an hriat ber chu Geology & Mining lam a ni tih a sawi. A laih tirhin excavator chi hnih a hmang phawt a, an lai hleithei loa, rock breaker khawl hmangin an lai a, hetang hian an hlauhthawng sa tawh tih a sawi. He khawl hian lei chunglang a tih chet nasat theih avangin AMC-ah complaint an thehlut a, an inpuhmawh kual ta a ni ber tih a sawi a ni.
Thudawn danin, he lei hi kumin March atang a che tan a, Haflong Welfare pawh hian a chhak lam atangin an lo thlithlai zeuh zeuh tawh a, a che chin hi a zau tial tial niin an hria. Kumin June 22 khan lei leh lung a rawn tla ta a, a thlang lama awmte chu June 23 zan atang khan an riakchhuak tan tawh. He lei chetna chhak lamah hian Assam type in, kumin January atanga sa tan, luah theiha peihfel tep tawh an awm bawk a, an ni pawh hian an khawih zui ngam tawh lo a ni. An ni hi chuan a hma zawngin lei che a awm ngai loa, an thlang lam kawng ana lei laih hnu ah chauha awm niin an sawi a ni.
Lei minna chhak kawng anah hian concrete building chhawng 4-a sang a awm bawk a, an ni pawh hi bungrua thiarchhuak loin anmahni erawh an riakchhuak thin a, tuna he lei che in a nghawng hi chhungkaw 10 dawn niin an insawi. Lei tla thei tur hi tuia phuh thlak rih zel a ni.
Helai hmuna lei laih chungchangah hian Aizawl Municipal Corporation chuan, Inrinni khan District Disaster Management Authority Aizawl kaihhruaiin AMC, Geology & Mining, PWD leh a kaihhnawih department dang atanga mithiamten an enfiah a. Inspection neih lai hian lei tla leh mai thei a la awm avangin chhiatna thleng palh a awm loh nan kawng block nghal a ni tih a sawi.
Ahmun laitu Lalhruaisanga, Chawntlangpui, Lawngtlai district chu rang taka leimin chhunzawm thei laite tifai nghal turin an hriattir a. Hna a thawh zawh veleh Aizawl DC/DDMA hnuaia Quick Response Team kaihhruainain a hmunhma hi tha taka khuh nghal tura ruahman a ni, tiin, kawng kal tan a him tih a chian hnuah chauh kawng hi hawn nise tia an rel thu an sawi.
‘Leiminna hmunah hian lei laih phalna (SD&SM permit) hi AMC chuan a pe lo a; kum khat chuang kaltaah khan leiminna chhak deuhah hian Pu Lalhruaisanga hi uluk taka leilaih dan tur khuahkhirhna (condition) siamsakin, lei laih phalna permit pek a ni a; mahse permit ang thlap hian vawiin thlengin hma a la loa, a permit hi a thi tawh nghe nghe a ni,’ AMC thuchhuak chuan a ti.