E Lungdar leh Leng tan thlai vawnthatna tur siam

E Lungdar leh Leng tan
thlai vawnthatna tur siam
Rural Development department hnuai Shyama Prasad Mukherji Rurban Mission (SPMRM) atanga sak, East Lungdara solar cold storage facility chu Nilaini khan RD minister Prof. Lalnilawma’n a hawng.
Kuthnathawktute thlaithar vawnthatna tur hawn a ni ta chu lawmawm a tih thu minister hian a sawi a. Loneituten tangkai taka an hman a duhsak thu leh ei leh bar intodelhna kawnga hmanraw tangkai a nih ngei a beisei thu a sawi.
“Chief minister Pu Lalduhoma kaihhruai Mizoram sawrkar chuan kuthnathawktute tan theihtawp a chhuah mek a, a chhuah chhunzawm zel dawn,” a ti.
Horticulture minister ni bawk Prof Lalnilawma hian East Lungdar, Leng khua leh a chhehvela Rural Development leh Horticulture department hmunhma leh hmalakna a tlawh nghal a. PHE hmunhma tlawhin East Lungdar leh North Vanlaiphai khaw tana tui pump tura hnathawh mekna – Tuipuiah leh Varva lui (Rawleihlawn chhuah) a tlawh bawk. A thawktu contractor-te koin, an hna tha taka tawk turin a hrilh a. Vantlang mipui tan tui mamawhna a san tawh em avangin hna chak taka thawk turin a hrilh.
Minister hian East Lungdar leh Leng khuaah mipuiin an duh leh an mamawhte an thlen theihna hun siamsakin public interview hun a hawng nghal a ni.