Eala lasi thawnthu kal lai tihtawpsaktu Pegula

Eala lasi thawnthu kal lai
tihtawpsaktu Pegula
Miami Open khelh mek women’s singles-ah Philippines tleirawl Alexandra Eala chuan boruak a siam rei riau a, Grand Slam champion ni thei a hneh nawn awn awn hnuah semi-final lutin, Miami Open history-a semi-finalist awm tawh zinga ranking nei hniam ber ni chungin tualchhung nula tantu ngah Jessica Pegula lakah pawh darkar hnih leh minute 24 chhung zet tan a khawh leh thei a, final em erawh a lut zo ta ngang lo a, lasi thawnthu ang maia a Miami zinkawng tuihnai atangin American Pegula chuan a sawiharh!
Set hnihna a lakna kawngah Rafael Nadal Academy graduate Eala hian vawithum ngawt Pegula a ‘break’ a, a tawpa tawpah chuan 7-6 (7-3) 5-7 6-3-in a tlawm ve ta nge nge a ni.
Filipino tleirawl Eala kha world ranking-ah 140-na niin, Miami Open-ah hian wildcard hmangin a inlan a, semi-final hial a thlen zawh avangin karleha WTA ranking thar tarchhuah turah chuan a career-a a vawikhatna atan world top 100 huang a lut ve dawn ta a ni.
Kum 19 mi Eala hian Miami a thlawhluh hma khan WTA main draw-ah vawihnih chiah hnehna a la chang a, Miami Open-ah zet chuan beisei phak baka ropuiin a inlan a,last four a luhna kawngah Grand Slam-a champion thei thiau pathum – Jelena Ostapenko, Madison Keys leh world number two Iga Swiatek a hneh a, final a lut zui thei mai ang em tih zawhna a len chhoh mek laiin kum 31-a upa Pegula a paltlang zo ta lo a ni.
Ningania hmeichhe singles semi-final pakhat zawkah world number one Aryna Sabalenka chuan 6-2, 6-2-a Jasmine Paolini hnehin a vawikhatna atan Miami Open final a lut a, tualchhung nula sa nghet leh phanchang Pegula lakah zanin hian fiahna lian zawk a hmachhawn dawn.
Belarusian Sabalenka hia tournament kal laiah set a la hloh lo chhunzawm zel a, last four-a a tumpui sixth seed Paolini lakah pawh harsatna sawi tham a tawk lo a, a zawna final tum hnih lutin, tunthla tir lam Indian Wells final-ah khan Mirra Andreeva a hneh lo a, Miami khawpuiah hian title hlawhchhuak lo zawng bawkin a tawp leh dawn em kan thlir ang.
Tarlan tawh angin, kum 26 mi Sabalenka hian Miami tournament lianah hian tunhma lamin final a la lut ngai lo a, kuminah erawh final a luhna kawnga Italian Paolini a paltlang thlengin harsatna lian tawh a nei lo a, final-ah tantu nei tlem zawk ni dawn mah se three-time Grand Slam champion hian rin a kai a, chak zawk tur erawh sawi theih a ni lo.
Top seed Sabalenka hian kumin bikah final vawili tehreng lut tling tain, January thla khan Brisbane-ah a champion a; Australian Open final-ah American Madison Keys hneh loin a tlawm a, chawlhkar hnih kalta mai khan Indian Wells final-ah Andreeva a hneh lo leh bawk.
Zanin final-a Sabalenka tum tur American fourth seed Jessica Pegula tan WTA 1000 final vawiruk a k helhna tur niin, a hmachhawn tur Belarusian a hrechiang a, amah aia thate zinga pakhat a nih avangin a tan inbeihna lian leh hautak a ni dawn tih a sawilawk nghe nghe!