Easter inkahhai puang, Russia-in a zawm lo
Easter inkahhai puang, Russia-in a zawm lo
Russian President Vladimir Putin-a chuan Pathianni thleng atan Ukraine-a ‘sipai chetna zawng zawng chawlh’ puang mah se Kyiv chuan tha an thlah chuang lo va, ‘Easter truce’ chu awmzia a awm chuang lo tih a sawi.
Putin-a hian darkar 30 chhung awh tur, an ram huna Pathianni zanlai dar 12:00 thleng indo chawlh a puang a, hetih chhung hian a sipaite chu eng emaw thil a awm chuan inring reng turin a ti thung.
Ukrainian President Volodymyr Zelensky-a thung chuan Kyiv chuan he thupuan hi a ngaihven reng a, Moscow chuan a bawhchhe nghal niin a sawi.
Russia-a Kursk leh Belgorod region-ah chuan inbeihna a awm reng a, Russian drone-te pawh hman a ni reng niin a sawi a, hmun dang erawh a reh deuh niin a sawi.
Zelensky-a hian Ukraine chu April 20 thleng, a hmaa US-in ni 30 chhung inkahhai a lo rawt tawh leh an pawm tawh kalpui turin a inpeih reng tih a sawi bawk.
Putin-a thupuan chungchangah hian Ukraine-a Foreign Minister Andriy Sybiha chuan, “Putin-a hian inkahhai a inpeih nia a lan thu a puang ta a, ni 30 ni lovin darkar 30 zawk,” tiin X-ah a tar lang.
“Vanduaithlak takin a thupuan leh a taka a thiltih inmil lo hi kan lo hre fo tawh a. A thu sawite hi kan awih thei lo va, a thu ni lovin a chet dan kan thlithlai zawk,” a ti bawk.
Putin-a hian rei lo te inbeih chawlh hi a chief of general staff, Valery Gerasimov-a nen an inkawm hnua a puan a ni.
“Mihringte dinhmun leh duh dan thlirin Russian lam chuan Easter truce a puang a. Hemi hun chhung hian sipaite chu ralthuam chelek lo turin kan ti a ni,” tiin Gerasimov-a hnenah hian a sawi.
“Ukraine pawhin kan tih ang hi an tih ve kan beisei a. Hetih rual hian he thil bawhchhiatna hi lehlam atanga a awm chuan kan ti let nghal ang,” a ti.
Russian defence ministry pawhin Ukraine-in a tih ang zela chhang let turin an ti bawk.
Tun hi inbeih chawlhsan puan thut vawi khatna a ni lo va. Orthodox Christmas lai, January, 2023 khan lehlam lehlam hian inkah loh an lo ti tawh bawk.
Russia hian February 24, 2022 atang khan Ukraine hi a bei tan a. Mi sang tel, a tam zawk sipai thi leh hliam an awm tawh.
US chuan Russia biain indo tihtawp dan a dap a, awmzia a la nei thei lo va. Thla hmas akhan Moscow hian US leh Ukraine ten indo tihtawpna tura rawtna awm an pawm tawh chu a hnawl.
US President Donald Trump chuan Zirtawpni khan Washington chuan rang taka titawp lo pawhin indo a tawp nan hma a la zel dawn tih a sawi.