ECI-in state pali leh Puducherry-a inthlan hun puang

ECI-in state pali leh Puducherry-a inthlan hun puang
Election Commission of India (ECI) chuan Pathianni tlai khan state pali – West Bengal, Tamil Nadu, Kerala, Assam leh union territory Puducherry-a assembly inthlan hun tur a puang.
Chief Election Commissioner Gyanesh Kumar-a chuan Election Commissioner-te nen thuthar lakhawmtute an kawmnaah puangin Model Code of Conduct hi state pali leh UT-ah hman nghal a nih thu a sawi.
Inthlan vote chhiar leh result puan chu inthlan zawng zawngah May 4 a ni ang a. Assam, Kerala leh Puducherry-ah April 9-ah vote thlak a ni ang a, Tamil Nadu-ah April 23-ah vote thlak a ni ang a, West Bengal-ah thawh hnihin, April 23 leh 29-ah vote thlak a ni thung ang.
Assam-ah hian assembly bial 126 a awm a; Kerala-ah 140; Tamil Nadu-ah 234 leh West Bengal-ah 294; Puducherry erawh 30 a awm thung.
Inthlan hmabak state pali leh union territory pakhatah hian electoral roll-te chu vote neitute list ennawn, Special Intensive Revision (SIR) kalpui mek a ni a. SIR hi ram puma kalpui tura ruahman a ni a, inthlan hmabak bikte hi a list February, 2026 khan tihchhuah a ni.
SIR kalpui hian politic-ah buaina a tichhuak nasa hle a, a bik takin West Bengal-ah phei chuan inthlan boruak a inmung atangin boruak luahtu ber a ni.
Congress chuan a hmain SIR kalpui avang hian ECI hi nasa takin a sawisel a, Model Code of Conduct pawh ‘Modi-a Code of Campaigning’ tihna a nih thu an sawi hial a. General Secretary Jairam Ramesh-a chuan inthlan buaipuitute hi rorel lai party-in ‘thil hawn, ribbon cheh chah, vai liam leh thil hawn’ an tih zawh hnuah chauh inthlan puanna phalna phalna pek an nih tur thu a sawi.
Shiv Sena (UBT) MP Sanjay Raut-a pawhin ECI hi BJP ‘extended branch’ tiin a sawi a, inthlan puanga thuthar lakhawmtute an kawmna pawh BJP office-ah ti mai thei tih a sawi bawk.
West Bengal-ah chuan Mamata Banerjee-i kaihhruai Trinamool Congress chuan a zawnin term lina atana tlin leh an tum mek a, eptu BJP erawh chuan an thuneihna chan zawn hi danchah an tum hle.
SIR exercise chungchangah Mamata-i kaihhruai TMC leh ECI inkara inhnialna nasa tak awm chu inthlan hmaa Bengal-a thil langsar ber a ni reng a, chief minister hian he kalphung hi politic hmanrua atana hmanga Bengali nihna leh vote neitute dikna chanvo tichhe thei a nih thu a sawi.
Kum 2021 inthlanpuiah khan TMC-in bial 294-ah 213 an la a, BJP chuan nasa takin campaign mah se bial 77 chauh an la a, kum 2016 khan TMC-in seat 211 an la bawk a, BJP hian pathum chiah an la.
Tamil Nadu-ah chuan Chief Minister MK Stalin-a DMK kaihhruai, Secular Progressive Alliance chuan a zawna vawi hnih tlin tumin an bei mek a. BJP nena tangrual AIADMK-in an an bei nasa hle bawk.
Kuminah hian kum 2021 inthlan aiin inbeihna a nsa zawk mek a, lemchan thiam atanga politic-a lut, Vijay-a Tamilaga Vettri Kazhagam (TVK) an tel ve chuan kil hnih inbeihna ni thin chu pathum inbeihnaah a chantir mek a ni.
Kum 2021 inthlanpuiah khan DMK-in chiang taka hnehna changin an party malin bial 234-ah 133 a la a, an thawhpuite nen 159 an la tling a. AIADMK hian bial 66 a la a, an thawhpui BJP-in bial li chiah an la thung.
Kerala-ah CPI(M) kaihhruai Left Democratic Front (LDF) chuan a zawna term thum chhung thuneihna chan tumin hma an la mek a. May thlaa kum 83 tling tur, Chief Minister Pinarayi Vijayan-a chuan LDF campaign a kaihruai mek a; mahse, term khat lo awm leh tur hi a kaihruai dawn em tih zawhna chu awm mek bawk.
Kum 2021-a LDF-in hnehna an chang bial 140-ah 99 an la a. Congress kaihhruai UDF-in bial 41 an lak laiin Kerala-a rorel laiin thuneihna chang tura mamawh zat an lak hmasak ber a ni.
Assam-ah tuna BJP kaihhruai NDA hian kum 2021-a Himanta Biswa Sarma-a kaihhruaina hnuaia bial 126-ah 75 lain term thumna chelh leh an tum mek a. Sarma chuan BJP hian Thawhtanni emaw, Thawhlehni emaw hian an candidate tur an puang dawn tih an sawi tawh.
Eptu lam atangin Congress chuan November, 2025 khan Asom Sonmilito Morcha kai tho lehinparty pariat tangrualin BJP beih tumin an inhlawm khawm a; mahse, Raijor Dal chuan bial dinna tur insem dan turah inrem lohna anneih avangin an chhuahsan leh tawh a. Congress chuan candidate tur list pahnih an tichhuak tawh a, 65 an awm a, an thawhpuiten bial 15 an puang tawh.
Puducherry-ah kum 2021 inthlan khan N Rangasamy-a kaihhruaina hnuaiah AINRC kaihhruai NDA-in bial 30 zinga 16 lain an sorkar mek.