Eco-Herbal Garden siam

Mizoram Pollution Control Board leh State Medicinal Plants Board Mizoram, Directorate of AYUSH tangdun chuan Govt. J. Thankima College Northern Campus Durtlang hmunah ‘Eco-Herbal Garden’ an din a. Govt. J. Thankima College Eco-Club zirlaite chu ramhmul damdawi thatna leh chin uar a pawimawhna zirtir an ni.
Resource person-ah State Medicinal Plants Board consultant (Medicinal Plants) Dr Lalrammuana Sailo hman a ni a. Ramhmul damdawi atana hman chi thlai leh thing hrang hrang natna enkawl nana an thatna leh hlutna a hrilhfiah hnu ah, Eco-Herbal Garden hi siam zui a ni. Ramhmul damdawi chi hrang hrang heng – Neem, Tejpatta, Sunhlu, Aloe vera, Kumtluang, Runhmui, Archangkawm leh a dangte phun a ni a, he Eco-Herbal Garden hi Govt. J. Thankima College Eco Club-in a enkawl zui dawn a ni.
H program hi sawrkar laipuia Ministry of Environment, Forests & Climate Change bultum niin, Environment Education Programme (EEP) hnuaia kalpui a ni. Mizoram Pollution Control Board chuan EEP hnuaiah hian Mizorama school leh college hrang hrangah eco club 1570 chuang a enkawl mek a. EEP-in a tum ber chu, eco club school leh college zirlaite hnena class room-a an zirlai piahlama environment humhim kawnga an thanharh theih nana zirtirna kawng hrang hrang pek a ni.