Economic assimilation a intan mek..!!

Mizoram First-in Aizawl khawpui chhunga vai dawr an zirchiannaah, Vai dawr zinga 76.2% chu a neitu Mizo, a ngahktu Vai tih hmuhchhuah a ni.
Zirchianna hian Kulikawn leh Zemabawk inkar Veng 24 chauh a tuam a, chutah chuan vai dawr 122 a awm tih hmuhchhuah a ni a. Hei hi a langsar chinah chauh a la ni lehnghal. Aizawl khawpui chhung Veng zawng zawngah endik ni ta se, Mizo hming hawha vai dawrkai hi hei ai hian a tam zawk dawn tih a hriat a ni.
Hei mai hi a la ni lova, zirchiannaa a lan danin, Vai dawr tam zawk (94%) te hian GST registration an ti lo a, chumi awmzia chu, sawrkar sum an eiru char char tihna a ni. Bungraw pawimawh bik, in sakna bungrua (hardware, cement, rod) leh ni tin mamawh (grocery/eichawp) zawrhna lian zual te chu Vai kutah hian a awm deuh vek tawh nia sawi a ni bawk. A steering chelhtu an ni der tawh!
Hnamdangte hian Mizoram sawrkar phalna anga dan dik taka dawr an kai thei a nih chuan thuhran ni se, chuti ni lova, a ram leilung faten hnam hming hawhtir chunga vai dawr an kaitir thin hi, dan bawhchhiatna a nih mai piah lamah, ram leh hnam chhiatna thlen theihna a nih avangin hlawkna uma hetianga hnamdangte hnena mahni hnam hming hawhtirtute hi ‘hnam hmelma’ ti hiala ngaih theih an ni awm e.
Nikum khan MZP lamin vai mistiri-te hnathawh dan zirchianna an lo nei tawh bawk a. Vai mistiri-te hi an huangtau tawh hle a, a chhawrtute an thunun nasa tawh hle tih an hmuchhuak bawk.
ILP chungchangah ni se, monitoring system a fel loh avangin ni tin ILP nei lo man chhuah tur thahnem tak an awm thei reng a. Vai dawrkai ten an dawra an chhawr mek vai zinga 34% zet chu ILP nei lo tih hmuhchhuah a la ni cheu bawk.
Heng thil thleng atangte hian, sawrkar hian a mawhphurhna leh a duty hi a hlenchhuak tha lo hle tih a lang a. Tunlaiah hmanrua a changkang tawh a, digital era-ah kan awm tawh a, fel fai taka thil tih zung zung theih a nih tawh laia ‘typewriter era’ ang maia kan la khawsa hi chu a tlawmthlak hle a ni.
Mizoram First ten an hmuhchhuah zawng zawngte hi sawrkar hmuhchhuah tur a ni a, mahse sawrkar hian a ti si lo lai tak hi kan ‘than-mawh-bawk’ chu a ni ber e. Hetiang renga kan kal chuan, ‘hei hi kan ram a ni’ kan tih pang pang lai hian, lang lo lamah Vaiho hian min lo chhuhsak fel der thei tih kan khawsak phung hian a tarlang chiang hle. Economic assimilation bul a intan mek a, ‘A spark neglected burns the house’ tih kha kan vawn tlat a pawimawh a ni ber e.