ED ten Rajasthan-a hmun 25 an dap

Zirtawpni khan Enforcement Directorate te chuan central scheme ‘Jal Jeevan Mission’ hnathawh kal mekah sum tih chingpen a awm ni a hria-in report an dawn bawhzuiin kan hmaa inthlang mai tur Rajasthan State-a hmun 25 an dap.
Congress Party-in sorkarna a siam mekna state niin Jaipur leh Dausa-a Additional Chief Secretary, Subodh Agarwal-a Office Public Health Engineering Department leh a chhehvel te he pawisa chungpen nia sawi zawng hian an dap a ni. Engineers te khawsakna thin te, contractors leh sorkar officers hna lo chelh tawh he thila inhnamhnawih thei ni a rin te pawh he an dapnaah hian an tel vek a ni. He pawisa bo zawnna hi The Prevention of Money Laundering Act (PMLA) hnuaiah neih a ni.
September ni 1-ah khan Enforcement Directorate te hian Rajasthan-a hmun hrang hrangah hetiang bawk hian sorkar pawisa bo dap hna hi an lo thawk tawh a ni. ED ten pawisa tih chingpen thubuai an dawn hi Rajasthan Police-ten First Information Report an dawn bawhzuia an hmalakna a ni. BJP Rajya Sabha MP Kirodi Lal Meena chuan kumin June thla khan Rajasthan state-a Central sorkar hmalakna ‘Jal Jeevan Mission’-a sum Rs.20,000 crore chu tih chingpen a nih thu a lo sawi tawh a ni. Meena sawi dan chuan he scheme-a project 48 lai maiah tenders Rs.900 crore man hu lai mai chu firms pahnih-ah experienced certificates lem hmanga pek an ni tiin a lo puh tawh a ni. The ‘Jal Jeevan Mission’ hi tui in tur thianghlim leh kham khawp tur in tin te hnena pekna tur project niin Rajasthan Public Health Engineering Department (PHED) ten hnahthawh hi an buaipui a ni.
Hetihlai hian, thla kal ta mai khan ED te chuan Jaipur-a Congress President, Govind Singh Dotasara chenna in chu an lo dap tawh a. Hemi bakah, Chief Minister Ashok Gehlot fapa, Vaibhav Gehlot chu Foreign Exchange Management Act (FEMA) hmangin thu an lo zawt fiah tawh bawk a ni. He pawisa chingpen ni a sawi dapna ED ten an neih hi Congress sorkar chuan – a hun te, an thil tum leh an tih chhan te hi Central sorkar tihtir niin an sawisel nasa hle a ni. Rajasthan Assembly – seats 200 awmna inchuh tur hian inthlanna November ni 25 hian neih a ni dawna, vote hi state dang te rualin December ni 3-ah chhiar a ni ang.