Education Conclave din rawtna thlen

Education Conclave din rawtna thlen
Education minister Dr Vanlalthlana chuan Niti Aayog member Dr VK Paul chu New Delhi-ah hmuin Mizorama zirna leh technology tihhmasawn dan tur a sawipui.
Mizoram tana Education Conclave nei tura rawtna awm sawiin Education minister chuan, he hmalakna hi Mizoram zirna ruangam enfiahna atan neih a tul a, hmasawn ngaihna lai, a bikin ziak leh chhiar thiam tam nihna chu rampum huap exam-a tih thatnan leh hnathawka rawih tlak tam zawk chher chhuahnan Education Conclave chu a tangkai dawn tih a sawi a. He hmalakna hi phurawm a tih thu Dr VK Paul hian sawiin, State Support Mission kaltlanga puih an inhuam tih a sawi a ni.
Secondary leh higher secondary zirlaiten financial literacy leh thiamthil zirna kaltlanga mahni kutkawih intodelh tumna thinlung an put theihna tura pilot project, ‘Project Intodelh’ (Self-Sufficiency) chungchang chu Dr Vanlalthlana hian a hrilhfiah a. NITI Aayog lam chuan he project hi hmalakna tha ber nia an ngaih thu leh class III leh VI tana Random Examination 2024- 2025 neih atanga State Report Card an hnena thehluh chu best practice document-ah an pawm a ni.
Zirna hmuna zirlaite hriselna endik leh vil chunchanga hmalakna pawh sawiho niin, Dr. VK Paul chuan he scheme hi hlawhtling taka kalpui turin School Education leh Health & Family Welfare department tanrual a tul tih a sawi.
Information & Communication Technology minister ni bawk Dr Vanlalthlana hian Mizoram University campus-a Software Technology Park of India din kawnga state sawrkarin harsatna a tawh pawh a sawi a. NITI Aayog chuan chinfel thuai a nih theihnan hma lakpui an inhuam tih an lo hrilh a ni.
DoNER minister Jyotiraditya Scindia leh secretary Chanchal Kumar te a hmuhnaah minister Dr Vanlalthlana hian Mizoram hmasawnna atana pawimawh hrang hrang a sawipui a. DoNER minister chu Mizoram hmasawnna atan theihtawp chhuaha tawiawm tura sawmin, zirlaiten mahni intodelh kawnga ke an pen theihnana pawimawh a thlen.