Education (Transfer & Posting)Rules-ah vantlang rawn dawn

Education (Transfer & Posting)
Rules-ah vantlang rawn dawn
School Education minister Dr Vanlalthlana hoin department hnuaia hmalakna an thlirlet a, Mizoram Education (Transfer & Posting) Rules 2020 chungchangah kumin July 18 hian mipui inrawnkhawm neih tura tih a ni.
Thutkhawmah hian school syllabus-a spoken Hindi telh chungchang, department inrelbawlna chherchhuan dan (administrative set-up) chungchang, huam zau taka zirlaite hmasawnna tehna Holistic Progress Card chungchang, pawl 8 chin hnuailam elementary education-a textbook thar hman, pawl 9 atanga pawl 12 inkar secondary leh higher secondary education syllabus-a subject dah belh leh district hrang hrang atanga thu rel tur lutte sawiho a ni. Heng bakah hian department that zawkna tura rawtna lut hrang hrang sawiho a ni bawk.
Mizoram Education (Transfer & Posting) Rules 2020 chungchanga vantlang inrawnkhawm neih tura ruahman a ni a. Draft rules hi School Education department website atanga download theih a nih thu leh rawtna leh sawi duh nei tan July 11 thlenga MERC email – merc.mizoram@gmail.com a thehluh theih a nih thu sawi a ni.
Hnathawh thlirletnaah hian common exam question kalpui dan tur sawifiah a ni a. Second term exam atanga kalpui tan tur niin, pawl 3 atanga pawl 8 zirlaiten zawhna inang an chhan theihnan ruahmanna kalpui mek a ni tih sawi a ni.