Edwards-a’n a kawnghren a humhim

Pathianni zing khan Las Vegas-ah hlawhtling takin UFC 296 neih a ni a, Leon Edwards chuan unanimous decision in a khingpui Colby Covington a hneh. Edwards hi a zawna vawi 12 chak zawnin, kum riat chhung zet hneh loh a nei lo. Kawnghren inchuhna dangah Alexandre Pantoja chuan Brandon Royval hnehin a kawnghren a humhim ve bawk.
UFC 296 a fight ngaihven hlawh berah Leon Edwards leh champion hlui Colby Covington te an inhnehtawk viau. Fight tih larnaah intibuai a, boruak nei hat tawh an nih vangin an inhlau lo tawn hle a, an fimkhur dun viau bawk. Round hnuhnung lamah US fighter Covington khel tha bawk mah se a khingpui a nawr tlat hret a, chak tur khawpin a insiamtha zo tawh lo. A khingpui titlawm khawpin inlan thei bik lo mah se fim taka inlan Edwards chungnung tluan a, endiktu pathumin point 49-16 in chak zawkah an puang vek a. A kawl mek welterweight title a kawl chhunzawm ta a ni.
Welterweight huangah Leon Edwards a chak tluang zel a, vawi 12 zet a chak zawn tawh. Welterweight a chak zawn rei ber chu vawi 13 chak zawn George St Pierre a ni a, Edwards hian George St Pierre record tluk turin vawi khat chak chiah a mamawh tawh. Kamaru Usman kawnghren a laksaka welterweight awpbettu ni ta Edward hian kum 8 chhung zetin hnehtu a tawng lova, a chak tluang par par hle.
UFC 296 Co-main event-ah flyweight campion Alexandre Pantoja chuan a kawnghren chuhpuitu Brandon Royval chu unanimous decision in a hneh a, a kawnghren a humhim ve bawk.
Champion lai Pantoja hian a tir phat atangin a khingpui Royval a nawr a, a keuhtlu fo. Round lina tawp thlengin chak ngei tura ngaih ni bawk mah se, round ngana tir lamah a talbuai a, a tlawm teuh hle. Brandon Royval hian hnek tluk ngei tuma a nawr luatah a chesual a, a tlu nawn leh. Hmuhnawm takin fight a tawp a, Alexandre Pantoja chuan a kawnghren a humhim nawn leh ta a ni.