Egpyt lakah Belgium an chak zo

Thawhtan zan leh Thawhlehni zinga World Cup 2026 khelhah chak an awm lo vek a, result rin sual runpui a thleng. Group G a inkhelah Belgium in own goal hmangin Egypt lakah tlawm an pumpelh hram a Inkhel dangah Iran leh New Zealand te 2-2 in an inhnehtawk ve bawk.
Belgium hian Lumen Field, Seattle-ah African ram lian Egypt an hmachhawn. An golden generation liam tawh mah se player tha tak tak an la kawl tho vangin Aigupta lakah hnehna chang tura rinkai an ni zawk tho. Rinkai zawk ni bawk mah se beisei an phak lova, tlawm an pumpelh thei hram chauh.
Mohamed Salah hova inlan Aigupta tan hian Emam Ashour chuan minute 20-naah tha zetin a pet goal a, hmahruaina goal a thun. Shour hi goal thun tura a che vel a dik vel vek. Fuh takin ball a dawng a, turning pui zet a nei a, na tak leh hmunawla pet lut turin a timing a fuh hle bawk. A goal thun hi goal tha bik zinga chhiar tel ngei tur zinga mi a ni.
Si an phurh hnuin Belgium in goal thun ngei tumin tan an khawh. Kevin de Bruyne chuan tha zetin free-kick a chhuih a, goal post a pet per hlauh thung. City winger hmuhnawm Jeremy Doku pawhin goal thun theihna hun remchang nei bawk mah se uiawm takin a hlah. Si an phurh reng hnuin Belgium in goal an thawkchhuak ta nge nge a, Aigupta player Mohamed Hany chuan minute 66-naah an lamah a ti-goal a, Belgium si phurh a sutsak. Hany own goal hi veteran forward Romelu Lukaku thawhrim zar a nihna thui tak a awm.
Goal khat ve ve an thun hnuin inkhel a hmuhnawm zui viau a, Egypt tan Omar Marmoush a hlauhawm thei hle. Inkhel hmuhnawm takah goal dang a luh belh thei tawh lova, 1-1 a inhnehtawkin, point khat ve ve an hmu.
Group G a inkhel dangah New Zealand in Iran lakah beisei phak baka thain an khel a, an chak teuh hle. Khel tha viauin tum hnih hmahruai bawk mah se an veng him zo lo ve ve a, point thum an hlawhchhuak thei bik lo.
New Zealand tan hian Elijah Just chuan minute 7-na lekah hmahruaina goal a thun. Iran tan Ramin Rezaeian chuan minute 32-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah New Zealand bawk an langsar hmasa leh a. Goal hmahruai thuntu Elijah Just chuan minute 54-naah hma an hruai nawn lehna goal a thun naa Iran tan Mohammad Mohebbi chuan minute 64-naah goal thunin an si phurh a sut nawn leh.
Goal hnih ve ve an thun hnuin inkhel a hmuhnawm zui viau a, chak tumin an innawr tawn nasa hle. Goal thun tumin tan khawh nasa dun viau mah se goal dang an thun belh thei tawh lo ve ve a, 2-2 in an inthathen zui ta a ni.
Group G-ah hian team pali ten point khat theuh an hmu a, an la intiattawk hlawm hle. Team lian deuh bera ngaih Belgium in Iran leh New Zealand an hmachhawn zui leh dawn a, group champion nih theihna hun tha an nei a. Chutihlai chuan tling thei leh tla thei dinhmunah an la ding vek thung a, a group a ngaihnawm chhunzawm.