Egypt in Ivory Coast an hnawtchhuak

January 10, Inrinni zan khan Africa Cup of Nations (AFCON) quarter-final khelh zawh a ni a, he inelnaa champion ngun ber Egypt chuan champion lai Ivory Cost hnehin semi-final an lut. Egypt hian kum 2021 final-a an hneh loh Senegal chu semi-final-ah an hmachhawn zui leh dawn. Inelna neih mekah champion tura rinkai Morocco pawhin semi-final an lut ve bawk.
Egypt 3-2 Ivory Coast
Afcon a champion ngun ber Egypt leh champion lai Ivory Coast te hi Le Grand Stade Agadir -ah an inhmachhawn. Team lian pahnih intum tur hian ngaihven a hlawh a, ngaihven a hlawh ang ngeiin inkhel hmuhnawm tak pawh a ni chiah bawk. Aigupta lamain goal an thun hmasak an chhawr tangkai a, thun tawp dawn hnaih lama The Elephant in lehthal an tumna an dang tluan thei hram a, hnehna pawimawh an chang.
Egypt hian Ivory Coast lakah bul an tan tha viau a, inkhel tan atanga minute lina lekah Omar Marmoush chuan hmahruaina goal a thun. City forward Marmoush goal thun hian Aigupta tlangvalte a fuih phur viau a, champion lai lakah inrintawkna sang zawk nen an inlan chhunzawm theih phah bawk. Hma taka goal an thun hnuin an khel tha chhunzawm a, minute 32-naah Ramy Rabia chuan an goal hnihna a thun zui leh a, an hmahruaina a tizau.
Si hniha an hnufual hnuin Ivory Coast in goal thun ngei tumin tan an khawh a, an khingpuite an nawr na hle. Na taka an khingpuite an nawr rah an seng a, Egypt chuan player Ahmed Fatouh chuan minute 40-naah an lamah a ti-goal palh a, Saipui si phurh a sut thensak. Goal an thun vangin The Elephant an phur thar a, an si phurh sut zawh ngei tumin tan an khawh. Inkhel hmuhnawm zui viau mah se chawlhlawk hmain goal lut a awm belh thei tawh lo.
Chawlhlawk hnulamah Egypt an khel tha chhunzawm a, goal an thun belh leh thuai. Minute 52-na lekah Mohamed Salah chuan an goal thumna thunin, an hmahruaina a tizau nawn leh. 3-1 a hma an hruai tawh vangin semi-final lut turin an dinhmun a tha viau tawh.
An khingpuite nen an inkar zau nawn leh mah se Ivory Coast an beidawng mai lova, hnehna chan let ngei tumin tan an khawh. Minute 73-naah Guela Doué chuan goal thunin an si phurh a sut then a, tlawm pumpelh beiseina sang zawk an nei thar leh. An si phurh sut zawh tumin tan khawh nasa viau mah se hun tawp thlengin goal an thun belh thei tawh lova, he inelnaa champion ngun ber Egypt lakah tlawmin an puanthuah an tel zui ta a ni. Ivory Coast hnawtchhuakt u Egypt hian semi-final-ah Senegal an hmachhawn zui leh ang.
Semi-final a Egypt hmachhawn tur Senegal hian quarter-final-a an khingpui Mali chu zirtawp zan khan 1-0 in an hneh. Senegal hian Mali lakah bul an tan tha a, Iliman Ndiaye chuan minute 27-naah hmahruaina goal a thun. Mali in an si phurh sut an tum viau laiin Yves Bissouma chu minute 45’+3-ah hnawhchhuah a ni a, hei hian Mali dinhmun a tichhe leh zual a, an si phurh sut tluan thei lovin an tlawm phah zui ta a ni.
Semi-final a inhmachhawn tur Senegal leh Egypt te hi kum 2021 khan final-ah an lo inhmachhawn tawh a, hun pangngaiah goal thun thei awn lo va, penalty shoot-out ah Senegal in 4-2 in hnehna changin an champion zui ta a ni. 2021-a an hneh tawh Egypt hnehin final luh ngei an tum dawn a. Egypt in 2021 a an tlawm tawhna chhangletin phuba lak an tum ve thung dawn a, inkhel hmuhnawm tak a nih ngei a rinawm.
Morocco vs Nigeria
Semi-final pakhat zawkah 2021 final a intum Senegal leh Egypt an intum dawn a, Semi-final lehlamah team lian pahnih Morocco leh Nigeria te an inhmachhawn ve thung dawn a. Hei pawh hi inkhel hmuhnawm tak a nih ngei a rinawm.
Inelna thlengtu leh champion tura rinkai ber zinga mi Morocco hian zirtawp zan khan team lian zinga mi Cameroon an hmachhawn a, 2-0 in hnehna an chang.
Morocco tan hian Brahim Díaz chuan minute 26-naah hmahruaina goal a thun a. Hun rei tak chhung goal lut a awm belh theih loh hnuin Ismael Saibari chuan minute 74-naah an goal hnihna a thun belh a, an hmahruaina a tizau. Cemeroon in an si phurh sut tum viau mah se hun tawp thlengin an si phurh a sut thei lova, quarter-final paltlang zo lovin an puanthuah an tel zui ta a ni.
Morocco hmaa ding tur Nigeria chuan inrinni zan khan champion hlui Algeria an hmachhawn a, 2-0 in hnehna an chang ve bawk.
Nigeria leh Algeria te hi an inhnehtawk viau a, chawlhlawk hmain goal thun thei an awm lo. Chawlhlawk hnu lamah Nigeria an khel tha lehzual a, goal hnih an thun. Nigeria tan hian player langsar Victor Osimhen chuan sencond half tan atanga minute hnihna lekah hmahruaina goal a thun. Hmahruaina goal an thun atanga minute 10-naah Akor Adams chuan an goal hnihna a thun zui leh a, 2-0 in hnehna an chang zui ta a ni.