Ei leh in siamna hmun thianghlim tawk lo

Tun hnaiah Aizawl khawpuia ei leh in siamna hmunte an thianghlim tawk lo tih hriatchhuah a ni a, hmanraw hman tlak loh hmang te pawh an awm tih pawh hriatchhuah a ni.
Health department hnuaia ei leh in leh damdawite endika heti lama thuneitu Food & Drugs Administration hnathawkte’n tun hnaiah Aizawl khawpuia ei leh in siamna dawr 100 chuang tlawhin an endik a, a tam zawk chu an choka a thianghlim tawk lo tih an hmuchhuak.
March ni 4 atanga April ni 1 thleng khan ei leh in siamna dawr hrang hrang an tlawh a, dawr 112 tlawhin an choka te an tlawh a ni.
Food & Drugs Administration hotute sawi danin, an dawr tlawh zawng zawngte zinga 80% vel chu an ei siam dan a thianghlim tawk lo tih an hmuchhuak a, ei siamna hmanrua an hman zingah thi (expire) tawh kawl an awm nual tih an hmuchhuak bawk.
Hotel leh restaurant te’n eitur siam leh zawrh phalna (licence) an nei tur a ni a, mahse dawr 100 chuang zinga 30 chuangin phalna hi an lo nei lo.
Ei leh in siam zirchhuak chhawr an tam lo a, eitur an sawngbawl kawngah an che pawlawh hle tihte an hmu chhuak tih an sawi a, eitur hi uluk taka dahthat loh a awm a, tho leh rannung dangin a lo bawm tawk te pawh an hmu.
Dawr 112 an tlawh kualte hi thianghlimna kawnga an dinhmun ‘rating’ an pe a, ‘excellent’ hmute zingah hian Aizawl chhunga hotel leh restaurant lian leh larte an tel lo. Mahse Food Safety Officer te chuan hotel larte hi thianghlimna kawngah chuan an inuluk ve hle nia a lan thu an sawi.