Ei ru lo tura intiam…

Nimin khan ZPM Val Upa Council chuan ZPM Legislature Party leh ZPM Gen Hqrs hruaitute kawmin hma lam huna party kal zel dan tur leh, sawrkar inrelbawl dan kawnga hmasawn zel dan tur an relho a.
He hunah hian ZPM Gen.Hqrs. President chuan, “ZPM te chuan ei ru lo turin kan intiam a, kan ei ru lo mai ni lovin kan hmuh phakah ei rûkna a awm lohna turin Pathian hre reng chunga kan kal a ngai… mipui hmaa kan intiamna hi Pathian hmaa kan intiamna a ni…” tiin a sawi a.
Sap Tawng thumal ‘corruption’ hi JF-a dictionary-ah chuan ‘chhiatna, bawlhhlawhna, inthamna, hlep rûk or ei rûkna’ tiin dah a ni a. Corruption tih hi a khaikawmnan ‘ei rûkna’ tiin kan sawi mai Thin a; sum ei rûkna chauh a ni lo a, a huam zauzia chu a hrilhfiahna aTang khian a chiang nghal mai awm e.
President thusawi hian a huam zau hle mai a, ‘ZPM te chuan ei ru lo turin kan intiam…’ tih hian ZPM party mi leh sa zawng zawng a huap nghal thei a. ‘Kan ei ru lo mai ni lovin kan hmuh phakah ei rûkna a awm lohna turin…’ tih pawh hian a kawh chu, sawrkar hnathawk ei rû tur thlengin kan dang (check) vek tur a ni, tihna tluk a ni awm e.
A enga pawh chu ni se, ei rûknaa an inhnamhnawih loh turzia sawina vek a ni. President sawi ang hian thil thleng thei se chuan, Mizoram state hi India rama state changkang ber leh hmasawn ber a ni ngei ang.
Tuna sawrkarna chelh mek party hi Mizorama political party zingah chuan a dangdai ber a tih theih awm e. Inthlan an hmachhawn dan leh election campaign an kalpui dan te, sawrkarna an han vawn phat aTanga chet an lak nghal dan te, legislator-te kal sual tur khalh ngil tur leh, sawrkar kal sual tur vengtu VUC an han nei bikte hi an danglamna a ni. An danglam bik lehna tur chu, ‘an intiamna an tihhlawhtlinin’ a ni dawn a, chu chu tun Tang hian mipuiin an thlir Tan mek ta a, chumi beiseia sawrkarna pawh hi mipui hian an pek a ni, a tih theih awm e. Tuna an intiamna ang hi an tihhlawhtlin theih phawt chuan, a zawna term li/nga chelh theihna chance an nei ngeiin a rinawm.