Eiruk awm lohna sawrkar din turin kan rintlak – Lalsawta

Eirukna awm lo sawrkar din turin an rintlak tih Congress president Lalsawta chuan a sawi.
Inrinnia Chalfilh bial Congress Joint Block Conference Sesawnga neih a hmanpuinaah MPCC president chuan Pathianin ram leh hnam, mipui min pek enkawl turin a ngaihna hria sawrkar tha, felfai leh a tul ang zela sawrkar che chhuak thei, eirukna awm lo sawrkar kan mamawh a. Chumi tur chuan hruaitu tha kan mamawhna a hmanhmawhthlak tawh, tiin, “Hei hi Congress chuan kan ti thei a, kan rintlak,” a ti.
BJP rim nam thur thur tualto party ZPM leh BJP nena inthlunzawm reng MNF party-ah rinna nghah ngam chi a ni lo, tiin a sawi a. “An ni kutah chuan kan ram, kan hnam leh kan sakhaw tana him lo Citizen Amendment Act, UCC leh Forest (Conservation) Amendment Bill a takin hman a ni thuai ang. Chumi hunah chuan keini ram neitute kan ram ngeiah hian mikhual chan pawh tluk loin kan awm dawn a ni,” a ti.
Ram enkawlna chu enchhin chi a ni loa, a nghawng a na lutuk, tiin Lalsawta hian a sawi. “Khawvel ram hrang hrangah sawrkar an enchhin ngai lo. An hriatchian sa an thlang thin. Chuvangin kan ram, kan hnam, kan sakhua humhim turin Congress party a sawrkar a ngai,” a ti.