Eiruknaa mawhphurtu politician – Lalduhoma

Eiruknaa mawhphurtu politician
– Lalduhoma
Ramin a chhiatpui ber eiruknaa mawhphurtu chu politician-te an ni tih ZPM leader Lalduhoma chuan a sawi.
Thawhlehni zana Sesawnga an party-in vantlang inkhawm an buatsaih a hmanpuinaah ZPM leader chuan an sawrkar ngei ang an ti thei lo naa, inthlan erawh an nghakhlel tawh hle tih a sawi. Kan ramin a chhiatpui ber chu eirukna a ni, tiin, “He thila a mawhphurtu ber chu politician-te kan ni. Mipui thlantlin roreltuten ram leh hnam hmasawnna aia eirukna leh hlemhletna an ngaihpawimawh zawk chhung chuan sawrkar hnathawkte leh mipui mimir chuan dikna leh rinawmna kan hnualsuat thin,” a ti.
Kan ram dinhmun leh tuna kan inrelbawl dan en chuan Pathian malsawm tlakin kan awm ta lo nia a lan thu Lalduhoma hian sawiin, “Lal Isua’n a ram leh a felna zawng hmasa turin min zirtir a, keini erawh chuan a pek belhchhah tur kan zawng hmasa a; kan Bible in awm dan tur min zirtir anga kan inzirtir loh avangin kan ram leh khawtlang kan tih hmasawn tumna hian min thansan mek a ni,” a ti. Politics chu ram rawngbawlna pawimawh tak a nih laiin, khelh dik aiin khelh fuh kan tum a, hei hian kan moral a tha lo zawngin a hruai nasa hle tih a sawi. ZPM chuan ram politics-ah Pathian ram thleng se, tih chu an ngaihpawimawh ber a ni thu a sawi a. Pathian tel lo hmasawnna chu engmah lo mai, tu chhungkaw tan maha thlakhlelhawm loh a ni tih a sawi bawk.