Eizawnna atan thiamthil zirtir zo

Eizawnna atan thiamthil zirtir zo
Mizoram Building & Other Construction Workers Welfare Board member-te tana LESDE department-in a buatsaih skill development training chhuakte hnenah Ningani khan certificate hlan an ni a. LESDE director John Tanpuia’n zirchhuak mi 45 hnenah a hlan.
Zirchhuakte hi general duty assistant course (healthcare sector) ah Mission Foundation Movement (MFM) hnuaia Skill Development Program kaltlangin a thlawnin training pek an ni a. LESDE director chuan healthcare lama thawk tur an nih angin, rawngbawlna rilru pu turin a chah.
Labour law siamthat mek a ni a, labour reform-na tur point 12 chu Assembly Session neih hmasak bera sawiho tura peihfel a ni tawh tih a sawi a ni.
Tun tuma zirchhuak mi 45 zinga 14 hian private hospital leh home-based caregiver hna an thawk tawh a, Japan-a kal turin mi 5-in tawng an zir mek a, Singapore-a kal turin mi 8 an inbuatsaih mek bawk.
MFM hnuaia skill development program kaltlangin mi 12554 hnenah thiamthil zirtirna pek an ni tawh a, mi 7342 chu hna hmuhsak an ni tawh. Healthcare sector bikah GDA leh geriatric care-giver mi 1500 train chhuah tawh an ni a, heng zingah hian Japan-ah mi 28 hna thawk turin an kal tawh a, Singapore leh Macau-a kal mi 100 chuang an awm. Private hospital hrang hrangah mi 200 vel an thawk mek a, home-based a thawk mi 250 chuang an awm a ni.