El-Clasico – 8:45 PM

Khawvela club ropui pahnih, Spain tualchhunga club inhal ber ni tel bawk Real Madrid leh FC Barcelona te chu 2025-26 season-a a vawi khat nan Pathianni zan dar 8:45 hian Santiago Bernabeu-ah an ikhel dawn. El Clasico hi Pathianni zana inkhel ngaihven hlawh ber a ni dawn.
La Liga champion lai FC Barcelona leh Real Madrid te hi season tharah champion tumin an inel leh nghal chat a, table chung ber an inluah chhawk. Real Madrid in khelh 9 atanga point 24 hmuin hma an hruai mek a, an hnuai chiaha awm Barcelona nen an inkarah point hnih a tla zep mek. Pathianni zana hnehna chang zawk zawk in hma an hruai zui ang.
Season liam ta khan Real Madrid in Barca an ngam lo viau a, vawi an inhmachhawnah an chak vek. Real Madrid an hneh theih em vangin tualchhungah trophy pathum an chawi a, hetihlai hian Real in kut bengin season an khar ve thung. Manager thar Xabi Alonso hnuaiah insiamtharin Barcelona hneh ngei an tum dawn a. Barca in an cho viau dawn bawk a, inkhel hmuhnawm tak a ni ngei ang.
‘El-Clasico khelh a nih tawh chuan Spain hi darkar khat leh a chave chhung chu a chawl thuap thin e’ an ti. Spain khawpui Madrid-a football club lian ber Real Madrid leh Catalan biala khawpui lian ber Barcelona te hi football vang chauha inhal an ni lova, politics thil tak pawha inhaw em em reng an ni. Catalan bial hi Spain atanga inlak hran tum reng, Spanish pawh inti tha duh lo ‘Catalonia’ inti ngat an ni. Hei vang hian an inhal em em reng a, an atchilh football a an inelna phei chu a nasa in a rapthak leh zual.
El-Clasico hi vawi 209 khelh a ni tawh a, Real Madrid in 105-104 in hma an hruai mek a. Pathianni zanah Barcelona an chak a nih chuan 105-105 ve ve hnehna changin an intluk chiah ang. El-Clasico-ah hian vawi 52 an lo in draw thawh bawk.