El Mencho thah vangin Mexican football buai

El Mencho thah vangin Mexican football buai
Ruihhloin a tihbuai em em ram Mexico-ah chuan Pathianni khan ruihhloa sumdawng intelkhawm pawl lian taka an hotupa (cartel leader) Nemesio Oseguera an tih chu Mexico City-a sipaiin operation an kalpui tumin an that a, hei vang hian cartel mi leh sa nia hriatte’n hmuh hrang hrangah buaina an chawkchhuak a, buaina chhuahna ram bial vela kartawp football match hrang hrangte chu venthawn thilah ni danga khelh atan sawnhlat a ni hlawm.
Hminglema ‘El Mencho’ an tih mai hi Jalisco New Generation Cartel (CJNG) an tiha an hotu lawk ber niin,
he pawl hi ruihhlo hlauhawm ‘fentanyl’ an tih mai siamchhuaktu lian leh ram pawn, a bikin, US leilunga tawlhluttu lian an ni.
Trump administration chuan CJNG hi foreign terrorist organisation-ah an puang a; US Department of State chuan an website-ah an hotu ber Mexico most wanted drug lord lu man hi US dollar maktaduai 15 tiin an ziak kulh!
Sipai thuchhuahin a tarlang danin, kum 59 mi Oseguera hi Jalisco state chhung Tapalpa khuaa sipaite nen an intawhchilhnaah a hliam a, Mexico City pana an phurh laiin a thi ta a ni.
A zuitute lungawi loin harsatna hrang hrang an siam a; an pawl inbun nghehna state Jalisco bakah Mexican state dangah pawh buaina hi a kangkai tawh a; ruihhlo buaipuitu pawl member-te chuan hmun hrang hrangah bus leh car-te halin, kawng an dang ping a, buaina chhuahna state-a sumdawnna hmun thenkhat hal ni bawkin, thuneitute nen an intawng hle bawk tih Jalisco Governor Pablo Lemus Navarro chuan thuchhuah siamin a tarlang a, civil mi thi report erawh an la dawng lo tih a tarlang tel.
Washington Mizo tarlan danin, White House Press Secretary Karoline Leavitt chuan El Mencho thahna operation-ah khan US-in Mexico sorkar chu intelligence lamah puihna tha tawk tak an pe niin a sawi a; an hotupa ber an thah bakah CJNG member dang pathum an thi a, pathum dang an hliam a, mi pahnih man an ni tih a sawi bawk.
Trump administration pawhin Mexican sipai nena thawhhona hlawhtling tak an kalpui avangin lawmthu an sawi.
He thihna hian nghawng a nei lian nghal hle a; kartawpa Mexican tualchhung football match thenkhat thulh a ni a; Mexico rama 2026 FIFA World Cup match thenkhat an khelh tur thlengin a buai phah mai ang em tih zawhna a piang nghal!
Jalisco state hi kumin June thlaa US, Canada leh Mexico-te inthlentawm tur 2026 World Cup match li thlengtu tur an ni a; he buaina hian engtia rei nge a awh dawn hriat a ni rih lo a, tun dinhmunah state dang pahnih Michoacan leh Guanajuato-te a kangkai tawh a ni.
United States leh Canada chuan an khua leh tuite chu Mexico tlawh kawnga fimkhur turin a chah nghal a, he rama an citizen awmsate pawh hmunhima inkhung turin an hrilh a; Mexico rama Indian Embassy pawhin Jalisco state chhunga Puerto Vallarta, Chapala, leh Guadalajara huam chhunga khawsa mek India mite chu fimkhur tur leh hmunhima tawmim turin a chah ve bawk.
Air Canada, United Airlines, Aeromexico leh American Airlines-te chuan buaina chhuah nasatna hmuna an flight-te chu an titawp rih tih an puang.
El Mencho thihna avanga buaina namen lo chhuak avang hian Mexican league chuan an social media page lamah Pathiannia top-tier game hnih khelh tur chu tiamchin awm loa sawnhlat a nih thu puangin, he’ng match-te hi Queretaro v FC Juarez (men’s league) leh Chivas v America (women’s league)-te a ni.
Pathianni veka khelh tura duan second division match hnih pawh thulh a ni.
Pathianni khan Aguascalientes khuaa women’s match khel mek Necaxa leh Queretaro player-te chuan Victoria stadium pawnah thawm ring tak an hria a, hlau hlawpin khelmual an tlanchhuahsan a; tualchhung media-te chuan an thawm hriat hi silai puak ri niin an tarlang a; a hnuah an khelh chhunzawm leh a, 2-1-in Necaxa an chak.
Acapulco khawpuia Mexican Open men’s tennis tournament organiser-te bakah Merida Open women’s tennis tournament huaihawttu lam chuan Thawhtannia tan tura ruahmanna an lo siam fel tawh chu thulh a nih loh tur thu puangin, venhimna erawh khauh leh uluk zawka kalpui tur a nih thu an sawi.
Nizan kha venhimna rit tak hnuaia Mexico national team-in Queretaro khawpuia Corregidora stadium-a Iceland an infiampui hun tur a nih laiin he friendly fixture hi kaltlangpui a ni ta em tih hriat han a ni lo.
‘World Cup fans tan hlauhthawn tur a awm lo’ – Mexico president
Heti ang boruak rit leh buai nuai nuai karah hian Mexico president Claudia Sheinbaum a tawng chhuak a, an rama 2026 FIFA World Cup match khelh tur himna chungchangah engmah hlauhthawn tur a awm loh thu leh an rama inkhel en tura lut fans tan rilru helhkham neih a ngaih dawn loh thu khawvel hriatah a puang zui ve nghal.
He thu hi Thawhlehni khan Sheinbaum chuan sawiin, an rama inkhel en tumte tan risk engmah a awm dawn loh thu a tiam a, top international soccer tournament him taka thlen chu an dinna a la nih reng thu sawi chungin, Mexico City, Monterrey leh Jalisco state khawpui Guadalajara-a World Cup match-te chuan khawvel puma football fans a hip ngei a beisei thu a sawi.
He Mexican nu hian Thawhlehni zing press conference-ah an rama buaina chhuak chuan ziaawm lam a pan zel thu leh security force lamin mipoui himna atan an hna an thawk ngawrh hle tih a sawi a, cartel leader Nemesio Oseguera laka rinawmte uaina chawhchhuah chu zawi zawia hmehmih zel a nih thu a tarlang tel bawk.
Thawhlehni vek khan FIFA President Gianni Infantino pawhin amah dawrtu reporter rual hmaah kumin nipui thawt laia Mexico rama World Cup match khelh tur chungchangah hlauhthawn a neih loh thu leh a rilru a hahdam thlap thu sawi ve bawkin, engkim a that leh vek tur thu a tiam ve nghal bawk.
Buaina chhuahna bulpui Jalisco state-a an governor Pablo Lemus pawhin Thawhlehni tho khan an state-in tournament an thlen ngei tur thu a tiam nawn ve leh bawk a, FIFA lam atangin an state chhung atanga World Cup match suanchhuah tumna a awm loh thu leh chu mi atana khelmual pathum an ruat tawhte pawh a din tlang tur thu a sawi.
Mexico hian kumin World Cup match 104 zinga 13 an thleng awn a, chu’ng zinga match li chu tuntum buainain a tlakbuak Guadalajara khawpuia khelh tur niin, June ni 11-a Fifa tournament lian ber an tan hmain preliminary warm-up match thenkhat he state chhungah hian khelh a ni bawk ang.