Election leh mipui

Mizoram inthlan hnuhnung ber (2018) kha November ni 28-ah vote thlak niin December ni 11-ah vote chhiar a ni a. Tun tumah pawh hian November thla tawp lamah vote thlak a nih leh ngei a rinawm a; chuti a nih chuan vote thlak hmain thla hnih tha awrh chauh campaign-na hun a awm ta a.
Political party hrang hrangten ngawrh takin election campaign an nei mek a, thahnemngaihna leh duhthawhna thawm pawh a ring chho tan ta viau. Hetih lai hian, campaign boruak sa hulh hulh karah, mipui lamin rilru fim kan put a pawimawh dawn hle a. Political party-te hian chakna an chan theihna turin mipui rilru an hneh a ngai a, mipui rilru hneh turin ram inrelbawlna kaihhruai an tum dan (manifesto) an tlangaupui theuh a, chuta tang chuan tute nge ram kaihruaitu atan tha ber ang tih chu mipui lamin kan lo thlang tur niawm tak a ni. Chutiang manifesto hmanga bukna khai chung chuan ram hruaitu turte hi kan thlang thin em? tih chu mipui tan zawhna pawimawh tak a ni awm e.
Democracy ramah chuan sawrkar siamtu chu mipui an ni tih a ni a, mipui siam sawrkar chu a tha leh tha lo a awm thin bawk a. Chuti a nih chuan sawrkar siamtu mipui that leh that lohah sawrkar that leh that loh chu a innghat ta tihna a ni awm e.
Mipuite hian ram inrelbawl dan ngun taka kan lo chik peih a, chuta tanga hruaitu tur ngun taka kan thlang thin a nih chuan, sawrkar chhe tak hi kan siamin a rinawm lo. Chuti a nih chuan, sawrkar tha siam tur chuan mipui hian ram hi kan vei hmasa tur tihna a ni a, ram veina tak tak nei lem lova inthlanpui te hi kan ar khawthim dai mai mai chuan, sawrkar tha kan siam thei dawn lo tihna a ni. Chuvangin, mipui hian ram tana kan pawimawhna leh mawhphurhna hi kan hriat a, kan hlut thiam hmasak phawt chuan ramin hma a sawn ngei ngei ang tih a rinawm a ni.