Electoral roll thar buaipui dawn Draft roll ah voter 858534 awm

Election Commission of India thuchhuak angin Mizoramah Photo Electoral Rolls Special Summary Revision 2025 neih a ni dawn a. Thawhlehni khan district tinah district election officer-ten draft electoral roll an tlangzarh.
Mizorama district 11 awmah voter mipa 415867 leh hmeichhia 442667, an vaiin 858534 an awm a. Service voters mipa 4259 leh hmeichhia 91, a vaiin 4350 an awm bawk.
Aizawlah chuan district election officer, bawrhsap Er Lalhriatpuia’n mipui en theih turin draftt electoral roll hi a tlangzarh a.
Tunah Aizawl district-ah Assembly bial 12 a awm a. Draft roll-ah voter mipa 135159 leh hmeichhia 153803, an vaiin mi 288962 an awm.
Draft Electoral Rolls 2025 atanga a landanin, Aizawl district-a voter tlemna ber polling station chu Tuivawl biala Chhanchhuahna P/S niin, voter 85 an awm. Voter tamna ber chu Aizawl East-I biala Zemabawk-VIII P/S niin voter 1494 an awm a ni.
Aizawl district-ah electoral roll-a chuang zawng zawngin EPIC an nei vek tawh a. Assembly bial 12-ah hian polling station 324 awmin, chawhrualin polling station pakhatah voter 892 awm ang an ni. Service voter 1422 an awm bawk.
Electoral roll siamthatna Special Summary Revision neih turah hian qualifying date atan 2025 January 1 hman tur a ni a. Hemi ni a kum 18 tling tur chu roll-ah thun theih an ni. 2024 October 29 atanga November 28 chhung hian hming thunluh ngai, paih ngai leh siamthat ngai tan dilna hun hawn a ni anga, heng dilna lut hi ERO/AERO ten an enfiah ang. December 24 ralhma in form lutte hi chinfel hman tur a ni a. 2025 January 6-ah final roll tlangzarh hman tum a ni.

District tina voter awm zat:
District Mipa Hmeichhia Total
Mamit 32886 32307 65193
Kolasib 30833 33194 64027
Aizawl 135159 153803 288962
Champhai 28158 29554 57712
Serchhip 26275 28018 54293
Lunglei 50037 50965 101002
Lawngtlai 46358 46493 92851
Siaha 21729 23029 44758
Saitual 27577 28166 55743
Khawzawl 8814 8903 17717
Hnahthial 8041 8235 16276