Ella Langley & Riley Green ten Visual Media of the Year dawng
Academy of Country Music (ACM) Awards chu May ni 8 a sem tur a ni nain, award dawngtu thenkhat an lo puang lawk lawk zauh zauh a, nimin khan Reba McEntire-i’n Ella Langley leh Riley Green ten an hla ‘You Look Like You Love Me’ avangin 2025 ACM Award-ah visual media of the year an dawn thu a puang leh ta.
Ella Langley leh Riley Green te ian Country Thunder, Tampa-ah show neiin, stage-a an awm laiin, award an dawn thu Reba McEntire-i’n a puanna video clip an play thut a. Reba hian artist pahnih te a lawmpuina leh award an dawn thu hi puangin, “Min lo hrethiam ula, ka lo tibuai lawk che u, chanchinthar pui deuh puan tur ka nei a nia. Ella leh Riley ka lawmpui che u! Frisco (ACM Award semna hmun tur) a lawm hun tur ka nghakhlel tawh mang e,” a ti.
Langley hian April thla chawhnu lam khan Rock the Country, Knoxville, Tennessee a show a neih laiin ACM Award a dawn thu a lo dawng tawh bawk a, hemi tum hi chuan Miranda Lambert-i’n video clip bawkin new female artist of the year a dawng tih a lo puang tawh a, hei hi ACM Awards a dawn hmasak ber a ni.
ACM Award hi country music award-ah chuan a upa ber niin, 1966 atangin an sem tan a, kumin vawi 60 an semna tur a ni ta a, kumin hian nomination-ah Ella Langley hi a langsar ber nghe nghe a ni. Tunah hian award dawngtu la puan loh zinga nominee a nihna female artist of the year, single of the year, song of the year leh music event of the year-ah te pawh award dawng tur rinkai zingah a la tel.
Tuna award an dawnna ‘You Look Like You Love Me’ hi barroom duet, tang tha et awt tak mai niin, 2024-a an tihchhuah kha a ni a, Billboard Country Airplay chart-ah No.1 kaiin, Hot Country Songs-ah No.7 a kai a, Hot 100 chart-ah No.30 a kai thei bawk.
Ella Langley & Riley Green ten Visual Media of the Year dawng
Get real time updates directly on you device, subscribe now.