Eminem album thar ‘The Death of Slim Shady (Coupe de Grace)’ chu Billboard 200 chart No.1-ah a debut a, he chart-a a album No.1 kai thei 11-na a ni. Hetihrual hian he chart-a kar 12 a zawna No.1 tawh Taylor Swift album ‘The Tortured Poets Department’ chu No.1 atangin a tawlh ta a, ENHYPEN, Clairo leh Megan Moroney te pawh chart top 10-ah an debut.
Billboard 200 (albums) chart hi kar khat chhungin US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
The Death of Slim Shady (Coupe de Grace) hi an tlangzarh atanga kar khat chhungin US-ah 2,81,000 an hralh thei a, chung zinga 1,64,500 chu streaming atanga album tlukpui (on-demand official stream maktaduai 220.08) niin, album tak tak hralh chu 1,14,000a tling a, album-a hla mal hralhna atangin 2,500 a tling thei bawk.
Eminem hian he chart-a No.1 kai thei album 11 a nei tling ta a, Bruce Springsteen, Barbra Streisand leh Ye te nihrualin, chart-a No.1 kai thei ngahah pangana an ni a, The Beatles (19), Jay-Z leh Taylor Swift (14 ve ve) leh Drake (13) te an pha lo.
K-pop group ENHYPEN album thar ‘Romance: Untold’ chu 1,24,000 hralhin No.2-ah a debut a, he chart-a an thlen sân ber a la ni a, an album top 10 kai thei palina a ni bawk. ENHYPEN album hralh hi 1,17,000 chu album tak tak hralhna a ni, streaming atangin 7,000 (on-demand official streams maktaduai 9.53), hla mal hralhna chu chhiar tham a ni lo.
Zach Bryan ‘The Great American Bar Scene’ chu 88,000 hralh lehin No.2 atangin No.3-a a tawlh, Tayor Swift ‘The Tortured Poets Depatnment’ chu 82,000 hralh lehin No.1 atangin No.4-a a tawlh ve ta bawk.
Chart No.1hlui Morgan Wallen ‘One Thing at a Time’ chu 66,000 hralh lehin No.3 atangin No.5-ah a tawlh a, Billie Eilish ‘Hit Me Hard and Soft’ chu 57,000 ralh lein No.4 atangin No.6-ah a tawlh a, Chappell Roan ‘The Rise and Fall of a Midwest Princess’ chu 54,000 hralh lehin No.5 atangin No.7-ah a tawlh ve ta bawk.
Clairo album thar ‘Charm’ chu 47,000 hralhin No.8-ah a debut a, he chart top 10-a a lan vawi khatna a ni. Megan Moroney album thar, a full-length studio album pahnihna ‘Am I Okay?’ pawh 43,000 hralhin No.9-ah a debut a, he chart top 10-a a lan vawi khatna ve tho a ni.
Chart top 10 kartu chu Noah Kahan ‘Stick Season’ niin, 40,000 hralh lehin No.7 atangin No.10-ah a tawlh ta a ni.
Eminem ‘TDSS’-in Taylor Swift ‘TTPD’ a nawr tawlh ta
Get real time updates directly on you device, subscribe now.
Prev Post