EMR School sak hna thawh mekah Union MoS-in duhkhawp lohna hmu

EMR School sak hna thawh mekah
Union MoS-in duhkhawp lohna hmu
Tribal zirlaite tana zirna in ruahman, Eklavya Model Residential School sak mekah a tlawhtu Union minister of state for Tribal Affairs Durgadas Uikey chuan duh khawp lohna a hmu a, a enkawltu sawrkar department leh a satu contractor-te chu uluk taka thawk a, zawh hun tura bituk sa kumin March ralhmaa tha taka zo hman turin a hrilh.
Zan hnih riaka Mizorama tlawhtu Union minister of state for Tribal Affairs hian Ningani khan Eklavya Model Residential School Tlangnuam a tlawh a, a hmunhma endikin thawktute a kawm. Social Welfare & Tribal Affairs hotute leh EMRS Tlangnuama thawktuten an tawiawm.
Union MoS hian zirna lama sawrkar laipuiin hma a laknaah EMRS din chu a pawimawh zing ami a ni tih a sawi a. EMRS Tlangnuam sak mekah hna duhthusam lo a awm nual tih sawiin, contractor-te chu uluk taka thawk tura a chah bakah an hna hunbi tawp hun, kumin March hmaa tha tha taka hna zo turin a hrilh.
Social Welfare & Tribal Affairs director Dr Lalhriatzuali Ralte chuan Tlangnuam EMRS panna kawng chu fehkawng cheithat mai chauh a la nih avangin duhthusam a la ni thei lo tih a sawi a. Tun dinhmunah school hmunah tui a awm that loh avangin ruahtui khawlna tur ngaihtuah sak turin central minister a ngen. Mizorama EMRS ho hmasawnna tur leh din belh zel dan tura an mamawh hrang hrang a thlen bawk.
Tribal naupangten insen ngailoa a thlawna zirna tha an hmuh theihna atana sawrkar laipuiin a ruahman EMRS chu cheng tam tak senna ni mah se, sawrkar chuan insen a huam hle tih Durgadas Uikey hian a sawi a. Hei vang hian Social Welfare & Tribal Affairs department thawktu leh contractor-te chu an fate awmna tur anga ngai a, tha taka an thawh a ngai tih a sawi a ni.
Union MoS for Tribal Affairs hian Delhi a pan hma in Aizawlah thuthar thehdarhtute a kawm a. India ram a zalen hnua hun rei tak hmarchhak state ten ngaihsak an hlawh lo a ni a ti a. Tunah chuan chak taka hmarchhak state ten hma an sawn chu sorkarin a ngaihpawimawh leh a hnapui ber te zinga mi a ni a ti. EMRS building sak meka a duhkhawp lohna awm hi a sawi bakah Prime minister Narendra Modi-a’n tribal mipui hmasawnna a ngaipawimawh hle nia sawiin, tun sawrkarah pawh tribal minister 8 an tih a sawi. Tribal zirlaite hmasawnna atan nasa takin hma an la tih a sawi bawk.
Eklavya Model Residential School Tlangnuamah hian zirlai 101 an awm mek a, pawl 6 leh pawl 7 zirlai an ni. Zirtirtu 6 awmin thawktu dang 11 an awm bawk. EMRS Tlangnuam sak hna hi DJ Consultancy Services-in thawkin, hna zaa 95 zo tawh anga chhut a ni a, kumin March-a hna zo hman tura beisei a ni.
National Education Society for Tribal Students (NESTS), Ministry of Tribal Affairs kaltlangin Sawleng, Khawbung, Khawzawl, West Phaileng, Thiltlang leh Lungsenah EMRS sak tum mek a nih bakah Aibawk, Thingdawl, E.Lungdar, Reiek, Bunghmun, Sangau, Phullen, Champhai leh Bungtlang South-ah sak belh a nih theihnan ruahmanna siam a ni.