EMRS Tlangnuam la sa zo lo

EMRS Tlangnuam la sa zo lo
Eklavya Model Residential School (EMRS) Tlangnuam-a hmeichhe hostel-a inthiarna mumal lo leh zahawm lo taka siam nia sawi chungchangah Social Welfare & Tribal Affairs minister Lalrinpuii chuan hna hi thawh zawh a la ni lo a, contractor-te hi kumin December thleng hun pek an ni tih a sawi.
Thuthar thehdarhtute zawhna chhangin SW&TA minister chuan, EMRS Tlangnuam hi hna kal mek, December-a thawk zo tura hun pek a ni a. Girls hostel toilet hi drawing-ah partition awm tura tih ni mah se, estimate-ah a siamna tur sum ruahman tel a nih loh avangin contractor hian heti hian a lo chawlhsan mai niin a sawi.
Amah pawhin a tlawh tawh a, inthiarnaah hian partition siam a, pipe kal vel pawh inhnawh a awm lohna’n entha leh tura tih an ni tih a sawi. Zirlaite erawh a tulna avangin a rem dan ang anga luh tir an ni rih tih a sawi a ni.
Mizoram State Project Monitoring Committee chuan tunhnaia hnathawh an endiknaah EMRS Tlangnuam hi tlawhin, hmeichhe inthiarna mumal lo leh zahawm lo taka awm hi hi an hmu a. A kawngkhar pawh a quality a tha lo nia sawi a ni bawk.