END minister hovin ruihhlo do chungchang sawi ho Champhai police-in kum 1 chhungin Heroin kg 38.477 man

END minister hovin ruihhlo do chungchang sawi ho
Champhai police-in kum 1 chhungin Heroin kg 38.477 man
Excise & Narcotics Minister Lalnghinglova Hmar hovin nimin khan DC Conference Hall, Keifangtlangah Champhai sawrkar leh khawtlang hotuten ruihhlo do chungchang an sawi ho a, Champhai Bawrhsap Mohammad Aaquib chuan meeting a kaihruai.
He hunah hian Champhai SP Lokeshwaran R chuan Champhai Police ruihhlo do kawnga an hnathawh hrang hrang a sawi a, Excise & Narcotics Asst. Commissioner C. Thangchuanga’n an department hnathawh a tarlang bawk. Heng bakah hian Assam Rifles, Social Welfare leh YMA lamin an hmalakna an sawi bawk.
Minister Lalnghinglova Hmar chuan Champhaiah ruihhlo dona a thain fakawm a tih thu a sawi a. Border district a nihna angin ruihhlo lut leh chhuak a tam bik a, Mizo mipuite ruihhloin a tihbuai loh nan Champhai district hian chanvo lian tak a nei tih a sawi.
Champhai Police hian kum 2025 chhung khan NDPS Act hnuaiah case 149 an ziak lut a, mi 260 an man. Heroin kg 38.477, methamphetamine kg 622.4, crystal meth kg 5.169, caffeine kg 3,000, alprazolam kg 4.470 leh corex gram 1.6 an man bawk. Ruihhlo man runpui Operation Jericho an kalpui bawk a, nikum khan Phase I a zo a, mi 52 manin motor 17 an man a, heroin kg 9.235, methamphetamine kg 74.852 leh BEDC litre 565 an man a, tun thla January atanga tun kum March thleng hian Phase II an kalpui bawk ang.
Excise & Narcotics, Champhai chuan kum 2025 chhungin MLP Act hnuaiah mi 183 an man a, NDPS Act hnuaiah mi 132 an man baw. Heroin kg 14.577, methamphetamine kg 125.065, BEDC litre 2,733.100 leh country liquor litre 884.800 an man a, drug awareness campaign vawi 15 an kalpui bawk.