Energy tlakchhamah Russia-in India puih huam

Russia chuan Gulf buaina zual zelin khawvel puma tuialhthei phurh a tihbuai chuan India chu a mamawhah puih a inpeih thu a sawi niin Reuters-in Russian atanga a thu dawn a tar lang.
Moscow inpekna hi Asia khawthlanga buaina chhuakin energy inthawnna a tihbuai lai leh a phurhna kawng lun tak, Strait of Hormuz khar a nih avanga tuialhthei leh boruakalhthei sumdawnna a buai mek lai a ni.
Hetih lai hian Indian sorkar chuan Thawhlehni khan an ramah tuialhthei thlitfim loh leh dahkhawl a nei tam rih a, hun rei lote chhunga harsatna tawk thei tur an nih loh thu a sawi.
Sorkar thuchhuah chuan India-in ram chhunga petrol, diesel leh fuel dangte mamawh phuhruk turin tuialhthei thlitfim loh leh petrol atanga siam chhuah a khawl tam tawh rih a, chawlhkar ruk atanga riat chhung daih neiin harsatna thleng nghal thei tur a ni lo tih a tar lang a ni.
India-in tuialhthei thlitfim loh leh LPG a lakluh zinga a chanve vel chu Strait of Hormuz kaltlang a lak a ni a, US leh Israel-in Iran an beih hnuah leh a hnu lama Tehran-in lawngte an ram hnaiha kal lo turin a vau zui a, hei hian a phurte kal dan a nghawng bawk niin news agency PTI chuan a tar lang.
Tunah hian India hian tuialhthei thlitfim loh leh thlitdim sa a nei ni 50 chhung daih a nei niin sorkar thuchhuah chuan a tar lang a. Hetih rual hian thuneitute chuan Middle East buaina avangin thlitfim loh, LPG leh LNG lakluhna tur ram dang an zawng mek bawk.